100 Pipo die for fake refinery inside Imo State

E pass 100 pipo wey die for illegal refinery inside Abaezi community for Ohaji-Egbema, of Imo State, as the pipo burn sotay dem nor fit know who be who again.

One pesin for the village wey hin name na Ejike, tell tori pipo say everybodi wey dey the fake refinery die finish.

Ejike tok say nor bodi safe, even the pipo wey dem manage save yesterday, all of dem die this morning.

“Pipo pass 100 wey die. Pipo wey dey rush dey go find their family pesin but the bad tin be say, dem nor even fit know dem pipo as all of dem roast like chicken.”

The Commissioner for Petroleum Resources for the state, Goodluck Opiah, say govimet don dey find the owner of the fake refinery, Okenze Onyenwoke.

The Commissioner tok say “This na really bad tin. Govimet for the State don already dey find the owner wey get the fake refinery, I just advise am make hin come out, karey hinsef go give police or any security pipo.

“This na just pure wickedness; how pesin go sitdon dey tink of how e go take dey spoil the knotri. Many clean business dey wey pesin fit take make pure moni, abeg young pipo make una komot hand for wetin nor good.”

Share On:

Add a Comment

Your email address will not be published. Required fields are marked *