Nigerian singer and songwriter, Timi Dakolo, say make politicians for the kontri nor dey think say Nigerians na mumu cus this time nor be game as usual.
Na for Twitter Dakolo take write tok so on Thursday, he say;
“Dear politicians, to use this generation as fool go really hard. Like e no go too possible. We eye don open.”
This tweet dey come afta some pipo wey form as pastors and bishop go APC meeting wey dem dey open the foma govinor of Borno State, Kashim Shettima, as the nuba two man of Asiwaju Bola Ahmed Tinubu.
On Wednesday, nai Tinubu show Shettima as hin running mate for 2023 election, with pastors and Bishops wey show for the meeting.
After the event, naso pinsure and video start to dey fly and many pipo say na fake pastors and bishops go the event and even the party sef nor try at all.
But for statement wey the campaign organisation epp Tinubu bring, he say na just way to cus distraction.
He say the videos and pinsure na just handi work of other politicians to just cus confusion.
He tok say the event dey open to every bodi nai make dem come inside say dem be well wishers.