Pesin wey wan come out as president for APC, Adamu Garba, don get am hot from pipo for Twitter as he say make dem epp am buy the N100m APC form.
Garba bin don shout say why the moni for the form go big like that untill hin come dey beg pipo for Twitter to give am moni make e take buy the form.
Hin say make Nigeria epp am so that pipo go know say we dey tink of awa sef well.
This beging so, na afta Garba don tok for Twitter say hin dey support APC for the way dem go about 2020 #EndSARS we nor go gree.
The tin wey hin write na “My kontri pipo, my work with una don start o. Pipo wey say dem go epp me with moni, see the hankant nuba 1008404148 | Zenith. To use 100M take buy the form nor make sense but na bring one cup make I bring anoda cup of rice nai make pot of rice full.”
The tok don put many provocation for pipo bodi as some sef don even karey Garba go dry cleaner wash am come dry am for hanger.
@_AsiwajuLerry tok say, “ You don turn bambiala for app wey you tok say make dem ban abei, anytime wey I think say you don finish you go start with anoda kind funny tin.”
@Tee_Classiquem1 “You don komot from igberaga Twitter to bambiala Twitter jus naw naw, how you go even take dey come app wey you say na useless just how many months naw come dey beg moni? You don forget say na you tok say cow beta pass Twitter pipo? Why you nor go meet cow make dem give you moni?”
@Vinanderson5 “For pipo wey nor know, Dem just wan use this hankant to check how Garba take get N100m buy form. He nor fit say hin nor get N100m wey hin kip for one place nai make am dey ask from friend fans, supporters and well wishers.”
@Varnessa28 “Shebi una know say hin get the moni? And he just wan tok about am? So that hin go say na kontri pipo buy the form for am instead of am to come dey do many explaining where hin take get the moni from. Nai make am use twitter as hin next point.”