Jonathan Ogbe wey dey do NYSC for Asamabiri Community Primary School for Sagbama LGA, Bayelsa State, don slip with 12 years girl for the skool.
Ogbe na 31 years and afta hin yeye the small girl finish for last year September, as pipo come get to know, nai he run leave hin NYSC certificate cus he dey fear make dem nor karey am give police.
The coppa go karey the 12 years piken dey chop her kpekus. With wetin the girl papa, Nelson Gbaranbiri talk, hin say na he wife tell am say she dey always see some kind stain for the piken pant any time she dey wash her tins. Wey dem ask her she say uncle go beat her.
Gbaranbiri come say from there nai hin go report to police for Sagbama, but instead of dem to come catch the boy, police tell am say make only hin go arrest the coppa come, or give dem moni wey dem go take drive go karey the coppa. Even NYSC wey hin tell still dey do one kind.
Gender Response Initiative Team Oga, Dise Ogbise, say dem go meet the state police to know how far.
While for NYSC talkpesin for the State, Mathew Ngobua, say dem neva fit call the coppa plus the number wey hin even drop for emergency, since the two nuba nor dey go, and he even run leave e NYSC certificate.