Bad boys burn house, Delta chief, Pikens, Sista nearly die

One village Oga wey be, Eric Onwuegbuzia,  hin sista Chinaeze, and two of hin piken nearly die afta pipo wey dem send come kill am burn hin house for Oshimili North Local Goviment Area for Delta State.

Na on Sunday inside Ogbeosowa Quarters, for  Asaba nai e take happen.

Wey Eric dey talk to amebo pipo, he say na small tin make him and hin family nor die for night, as dem already dey slip before dem put fire for their house.

He say na like 8 or 9’Oclock for night nai dem dey hear some kind waka wey wake am from slip, as he open window spy, he see like eight boys with gallon of fuel dey pour am for the house, before he go turn eye, the house don already dey catch fire

“Na manage we take run go anoda persin house make dem for nor kill us. The mind wey the boys carry come na to burn me and my family, but we get luck say we nor die. We don loss propaty of big moni, as the house burn reach ground. Our family members all of dem don zamb from Asaba so make this boys nor go kill dem, as na around Asaba dem come from”.

He dey beg Delta State Goviment and Olokpa dem, to come epp and catch the boys wey do am this kind tin.

On Monday the Police Public Relation Officer, wey be DSP Bright Edafe, confarment the tori.

“The tin happen, but we neva arrest any bodi, we dey still use touch light look the matta”.

Add a Comment

Your email address will not be published. Required fields are marked *