Deacon don die as he dey tell church pipo make dem nor do blood moni

Slumps and dies

Kasala bust for one church wey be Evangelical Church Winning All (ECWA), inside Onikoko for Abeokuta, Ogun State, As one deacon for the church just fall for ground kpeme as hin dey preach on Sunday say make pipo nor dey do blood money.

One video wey the deacon, Ogunnusi, and hin na still the Baale of Onikoko community dey preach with Yoruba and interpreter wey dey epp am for English.

As the deacon dey preach say make pipo nor dey do blood moni, before the church pipo know wetin dey happen deacon don fall gbadam for ground.

Wetin Ogunnusi tok for Yoruba na “The moni wey you use wuruwuru take get, kill pipo, or even suck pipo blood, wey the die come na only you go die am.”

Pesin inside the church say na elder nai hin be, and that Sunday hin dey talk about die die, and how e nor good to kill pesin take make moni before he fall for ground. Before the English interpreter go tok finish every where don cast.

The church pipo sha rush am go FMC, Idi-Aba for Abeokuta, na there dokitor say hin don already die before dem reach.

Weda the deacon get sickness before for bodi, the pesin for the church wey tok to tori pesin say hin nor know.

Share On:

Add a Comment

Your email address will not be published. Required fields are marked *