Ewolewo nai be the case wey dey play naw as EFCC don gbab one Bolarinwa Oluwasegun, wey dey form say hin na Army General, and use wayo take tiff pesin N270milla.
The man form say hin na Army General, go meet one oda pesin wey be Kodef Clearing Resources, say Presido Muhammadu Buhari, don put hin name and anoda pesin make dem be Chief of Army Staff, COAS, and hin nid moni to take press so that e go fit get the position.
No be only that one sef, he still do fake appointment leta from COAS wey Presido sign, come show the man.
For the leta hin talk say he nid some kind big moni wey he wan pay to FG, as part of the tin wey COAS position karey folow bodi.
To make sure say he play the man wey come outside come talk, Oluwasegun do fake dokumet plus president signature.
Na on Wednesday, January 12, 2022 nai dem arrest am for hin house wey dey for Alagbado inside Lagos State. Wen dem catch am, na six pump action, three carton of bullet, one swagger stick, and different paper wey hin take dey play wayo nai dem see. As dem look him mata finish, na straight to court nai hin road go be.