Gbege Don Lead To Kpuffing For Ofouma Community Cus Of Position




One pesin don die and three pipo wound as fight dey go on for Ofuoma cus of who go be leader for the community.

Different parties for the community don dey get am hot for three years naw cus of the new executive committee wey dem put for Ofuoma Community Development Union.

The man wey die na Mr Felix Edenughe, wey be the Vice Youth Chairman for the community, and na on Saturday night nai dem kill am as the battle come too hot.

The main resin why dem kill am neva too clear as per say wahala don dey the water before.

One insider say na four pipo nai dem shoot but na one pesin die, he say the problem start since 2019 cus of leadership position since na two kwatas dey the community , and one of dem nai suppose be president general.

He say wey dem do the screening nai dem see say some pesin nor qualify for election, naso police take enta the case then mata land for court.

Dem do the election finish, some pipo say dem nor go support am, and na so e come be till now as the community divide into two.

The source say before the gbege na one Okpakorere wey be the oldest man to hold position nai dey but now, naw na two dey for the two kawtas.

Yesterday, Police Public Relations Officer DSP Bright Edafe confimate the kpuffness.

Share On:

Add a Comment

Your email address will not be published. Required fields are marked *