Hand Don Touch Fake Revenue Task Force For Delta



As pipo for Delta State don dey shout the way task force for the state take dey kolet moni anyhow for dem hand for road, on Wednesday nai officers of Delta State Task Force for Road Taxes and Revenue Leakages arrest fake revenue task force wey dey kolet moni from motor pipo hand.

Malachi Moye wey be the Coordinator of the state task force, say dem get to start catch the fake task force as dem own don too much.

“This fake task forces own don be anoda kind tin and e don dey give the state bad name.

“Na State Internal Revenue Service for the state nai get right to kolet revenue for the state. The pipo wey want be revenue agent make dem go meet Revenue Service before dem start to kolet any moni for the state.

“Today for  Sapele, Oghara and Koko side, we arrest some of the fake pipo wey dey kolet moni for motor driva hand.”

Moye say pipo wey dey do all this kurukere movement make dem stop am now as govimet go punish any bodi wey dem catch.

He say some pipo don complain to the state govimet about this fake task force for road.

Task force coordinator say as e be so dem go karey the operation reach other part of the state, and the ones wey dem catch na straight to court.



Share On:

Add a Comment

Your email address will not be published. Required fields are marked *