The Headkwata of First bank wey dey for Central Business District, for Abuja, FCT High Court don close am cus of garnishee order.
This garnishee order mean say the judgement wey dem give dey open to pesin wey dey own gbese, to make the judgement favour am.
Na way wey dem dey use take dey force judgement of gbese for pesin wey dey own moni to fit pay back.
News Agency of Nigeria tori nai say FCT High Court Enforcement Unit nai match enta the bank with towing vans and cranes come karey some kind tins from the bank.
Wetin dem karey na dem stand-by generators, Hilux vans and air conditioners, join with other tins.
One pesin for the court wey follow NAN tok but nor call hin name say, Na long story, but na about the garnishee order wey dem give against the bank and the bank nor follow up.
Tori pipo try to tok to the head of the unit and the bank officials to tok about the mata, but for where.
Some staff wey dey work with the bank say this na just embarrassment, as dem for fit handle the mata with anoda pattern instead of this type.
NAN say dem still try to call the bank Headkwata for Lagos but dem nor ansa.
Many of the customers for the bank just dey outside the bank dey observe.