Lagos police don catch one pastor Elijah Emenendu, wey get Chapel of Revelation Ministry, as hin nack three brodas wey be hin church members.
The pastor wey get church for Ajegunle inside Lagos State, don dey use kona marking take dey collobi the three brodas since, until one of dem come get mouth take talk.
As the tori take drop for Vanguard be say, Emenendu bin don start to dey enta the senior broda yansh afta hin give am vision say e wan epp the boy stop yahoo yahoo.
Na that process nai the pastor come still teach the boy how to masturbate, say by like that parwa of God go enta the boy bodi afta hin the pastor don slip with am through hin back side, wey come make blood dey rush komot from the boy yansh.
From last year wey the boy start to dey stay with Emenendu, hin dey slip with the boy four times in a week, two times everyday, don put mop stick for the boy yansh, use injection take shuck hin gbola and navel. But since that last year the boy never fit tell any bodi.
From the senior broda nai the pastor enta the broda wey folow, tell am say hin sperm nor good so hin get to masturbate and still slip with am.
Afta nai he enta the last boy, come even slip with dem and say make the three brodas slip togeda with dem sef afta one church service for the pastor hotel room.
The mata don too worwor for one of the boys, nai he gather mind come out to talk. From Ajeromi police station dem don karey the mata go Area B command for Apapa to judge the case.