Every bodi shock as Yul Edochie wey dey act film tok for social media say hin don marry second wife, Judy Austin.
He come even say the actress don born piken for am. Since the tok start for social media Yul first wife wey be May, and don born four children for am, nor tok anytin.
But for Instagram Live session nai May dey tell her fans say since her husband go marry anoda wife na depression nai be her padi.
“I see some comment wey pipo tok say I dey wan use everytin take get moni. I nor be that kind pesin, but I nor even pray for this kind tin for my enemy if at all say I get one. Depression na real tin and e get different stage. For my side instead of say make I die for depression nai I get up gada the fine side of life wey I still get and ahead ahead.
“The world wey I dey before fine o, before e come scatter. So I gat get up and decide to dey happy instead of stay one cona dey cry and think. I dey happy say I don dey komot and dey happy for mysef.
“I dey suprise for mysef, but all na cus of love and support from my family and una wey dey outside. Una really try and the love nor be here. Some pipo say I dey inspire dem but the truth be say na una dey inspire me.”