The govimet for Zamfara State don tell everybodi for the state make dem go get gun to take protect demsef cus of bandits and terrorist wey dey disturb the state.
On Saturday nai the commissioner of information, Mr. Ibrahim Dosara take bring the information come outside.
The govimet say dem get to folow this way cus of the way tins dey yanga yanga for the state.
The commissioner still say govimet don already ready to give 500 forms to the 19 emirate for the state wey ready to get gun.
He say pipo wey know say dem sabi shoot gun and like to get gun, make dem go meet the state Commissioner of Police to get gun license.
No be only gun nai the govimet do sef, he still wan employ 200 pipo wey go dey guard the community for the whole 19 emirate for the state.