Some pipo wey dey stay for Orhuworun for Delta State don write leta give IG of Police, Usman Baba, say make e come epp for the cult mata wey dey always happen for the area.
Na Godspower Oghenewegba and John Efeurhobo wey be chairman and seke of pipo wey dem mind dey worry dem for Udu community, nai say dem nor go fit dey open eye dey look as pesin dem wey nor know anytin go just dey die like foul cus of gbebe with cult pipo.
Dem say the tin don belleful dem reach neck as na four years naw nai this cult don dey get this dem fight, and even Govor Ifeanyi Okowa and Udu Chairman, Chief Jite Brown don try for the mata but as e be so na strong hand nai dem nid for the mata, so that pipo for the area nor go dey karey fear any how waka.
This cry dey come cus of the too much killing for Orhuworun wey even don reach Mofor park. Dem say make the IG of Police do sometin cus even skool for Orhuworun sef nor dey work like before cus of this mata.
Before, with the local govment Chairmo, army, police, civil defence and oda security pipo, the area dey calm. So make IG resin with dem so that peace go come back to the area cus some of the pipo wey even wound for the last fight still dey for hospital dey take treatment.