Man wey Buhari want for EFCC Board Start School from hin Mama belle


Senate don confarment some pipo wey go be Seksek and board members for EFCC, wey Presido Buhari submit give dem on Tuesday.

One of dem na Alhaji Yahaya Muhammad wey Presido say hin start primary school before dem born am.

The Committee ontop no dey do wuruwuru matta, don say this pipo wey dem bring their names come nor get any bad tin for their cupboard, and na Senator Suleiman Kwari from Kaduna nai bring the report.

Before then, Senator Hassan Hadejia wey hin na from Jigawa North East, don say the CV wey Muhammad bring, dey show say hin start school before dem born am.

Hadejia afta he don use touch look the CV wella, come say, “He get to let the House know the kind K-Leg wey dey inside one of the pipo wey want position paper, one of dem wey be Alhaji Yahaya Muhammad, wey he match line for page 8.

“Persin wey want position, with wetin dem dey see, say he start primary school for inside hin mama belle. even for the experience wey he say hin get for school nor clear, how dem go born you 29th of September, 1969 and you go primary school for 1968.

“If you go Teachers college for Borno from 1975 to 1988, the same time you dey go College of Admin from 1980 to 1981, broda how you take do am?

“If K-leg dey like this, I nor know o, Oga (Senate) Presido, be like we go tell dem make dem write am again because of future purpose.”

Upon that, Senate still give Mohammad the position. Kwari tell senators say he don luk the pipo well well and dem dey okay to dey the position wey dem give dem.

Deputy Senate Presido, Ovie Omo-Agege, nai sitdon wey dem resin the matta finish, na so he dey shake the pipo.


Add a Comment

Your email address will not be published. Required fields are marked *