The Muslim community wey dey for Kaduna don epp pay monie and buy okada take give bandit wey tiff church pipo to fit take free 16 of dem wey remain.
Na for May 7, 2023, wey the church members dey do Sunday service for Bege Baptist Church for Madala near Buruku inside Chikun LGA nai the bandits take tiff 40 pipo inside the church.
Some of the pipo wey the bandit tiff find their way run reach house come remain 16 wey dey with the bandits.
Yesterday as the chairman of the Christian Association of Nigeria for Kaduna state, Rev John Hayab, dey folow tori pipo tok he say the Muslim community try wella and wey dem make the 16 pipo come outside.
He say na the Muslim community wey the church pipo wey bandit tiff dey stay, nai gada monie take buy okada and use the oda part take pay for ransom wey the bandit tok so that dem Christian brodas and sistas fit free.
The CAN president come till tok say the example wey the Muslim community for Madala don do make others folow their step so that peace go dey for the state.
He finally come say the Muslim community just show say no be about skool nai pesin go take do good and make all Nigeria folow the step to fight insecurity.
Dem say 16 of the church pipo don see dem family, while the ones wey still wound dey for hospital dey take treatment.