Who say Emerhor Political Family, EPF dey wan komot from APC? We tanda gidigba with APC and nor go anywhere, na only pipo wey dem belle nor face front wey before Deputy State Chairmo of the party, Chief Cyril Ogodo dey lead nai dey run go anoda party. But as for we, Olorogun O’tega Emerhor wey bring APC come Delta State we go no where.
This one dey come afta Chief I. Ogodo, Chief Sylvester Kohwo and some oda pipo komot from APC go join PDP. Emerhor come say na just dem belle those pipo dey fight for, as dem don kolet moni finish come run. He say na laugh EPF just dey laugh dem for their yeye karata.
As e be so Emerhor political leg still strong kakaraka for ground, Chief Oloko nai dey Coordinate and Head of EPF, Chief Ogodo nor be Oga here. Even EPF Elder forum go meet this week to put anoda pesin for Chief Kohwo position.
Make dem nor dey use EPF name take dey hype demsef so that PDP go give dem beta moni. PDP make una enjoy una new pipo we for APC nor go miss dem. Na the word from Olorogun O’tega Emerhor.