Meet the Presenters Richard Gbajimi Presenter My name na Richard Gbajimi. I be Co-Host of "The Good Morning Inside This Morning Show" For Kpoko 100.5 Fm. Monday To Friday. From 7:00am go hit 10:00am. Ontop radio marras, pipo sabi me as The Iyase 1 of Kpoko FM, Onowu 1, The Honorable Minister Of Talking Affairs, Loyal Bros & The Adjerese 1 Of radio marras. Make e for nor loss, apart from radio, I be Motivational Speaker, MC, Comedian, Compere & Actor. And Baba God give me sweetilicious wifey with correct pikins. #Egwegwegwe! Richard Nwajei Sports Presenter My name na Richard nwajei. I study History and International relations for delta State University abraka. For untop kpoko 100.5, I dey run early morn morn sport(8:45am, mon-fri), waka sports( 6pm mon-fri) and weekend sports (6:30pm Saturday). I love dey follow up sport matters, I also love to the research on matters Wey concern politics, business music etc Apart from radio things Wey I love scatter, I be entrepreneur, film script writer, Data analyst and a poultry farmer / Agro processing expert. Brume Faith Eyavore Presenter Brume Faith Eyavore wen them dey also call BrubruDApiapia na award winning on air personality with Kpoko 100.5FM. Brubru come from Ughelli South for Delta State and na graduate of Mass.Communication. She start her radio career wella for 2015 with Crown 89.9FM where she's take be the host of Saturday Oyoyo program. For 2016 she come join Kpoko 100.5FM wen be Pidgin English radio station where she come take be co-host of The Good Morning Inside Dis Morning Show. Them no Brubru well for the way she take dey deliver wella with pidgin language and warri slangs, any time she dey on air dey present, read News for Pidgin or dey do advert. This beautiful talented presenter na also motivational speaker wen dey constantly give inspirational quote as she dey us pidgin language for her IG page. She like fashion well well and when she dey off air, she dey like focus on making cloths, she self loves reading and singing too. Oya listen to her live @Kpoko 100.5FM Monday -Friday 7-10am on The GoodMorningInsideDisMorningShow. Mike Mike Presenter Michael Ekemin Effiong aka Mike Mike na ogbonge talkie talkie person wey warri langua dey flow freely him mouth. He study industrial physics from Enugu State University of Science and Technology. Though him don dey dream to work for radio for a longtime but he enter radio on January, 2016. Na him dey handle the soji things program and he sabi yarn matas for politics, countri matas, entertainment tori and students matas. One of he characters na to always dey ginger country pippo to stand for deir right. Lady-T Presenter Theresa Onajite aka Lady-T na OAP,MC,Red Carpet host and hair stylist. She be graduate of mass communication from Auchi Polytechnic and a memmber of Nigeria Institute of Management [NIM]. She currently dey host the #Waffi Maras Show ontop Kpoko 100.5FM from 1pm to 4pm. MC Flexy Presenter Owhere Aghwere Felix, dem born am 1st march and he come from Ogunu community for Warri South L.G.A Delta State. MC Flexy(Son of Grace) nai be him stage name but area dey call am Aproko King becus he dey always dey talk truth weda he dey radio or outside radio. MC Flexy na OAP,gospel comedian,MC,actor,motivational speaker and entrepreneur. Follow MC Flexy,The Aproko King on radio from Monday to Friday 4pm-7pm(Wakalicious Waka Tinz) Mariam Nwobe Presenter My name na Mariam Nwobe. I come from Ubogo for Udu Local Government Area of Delta State. Na Warri dem born and train me. I be 4th child among 6 children. I be graduate of History and International Relations from Delta State University, Abraka. I don marry with two fine children. I like broadcasting well well and that one don help me so tay I don bam for English and Pidgin presenting. Na me dey host the “make e beta for you” show on top Kpoko 100.5 FM for Warri from Monday to Friday, 10am to 1pm. Apart from listening to radio, I like to watch film and my philosophy na “Live and Let Live” Eva Aboyewa News Caster Eva Aboyewa aka News Bulunga na confirm warri babe wen come from Ughelli North Local Government Area for Delta State. Eva na Christian and na on the 9th of June nai her mama born her. She go Delta State University Abraka where she for study biochemistry technology. She be married woman wen no like dull and fake people. She like to dey play scrabble and table tennis and she dey like to make people happy. She don deuy for radio since 2015 and she like wetin she dey do because e dey give her the opportunity to meet with people everyday. Aside radio, she na MC/red carpet host, caterer, actress, motivational speaker and she na lover of God. Her slogan na hold something and he watchword na better days ahead.Follow her for tinkili/ogbonge news monday-friday 8am-4pm Jennifer Omoko Presenter Jennifer oghenekevwe omoko multiple award winning presenter aka finegirl fineface na the #TimeOut show presenter for kpoko 100.5fm wen dey run from Monday to Friday 10pm go stop for 1am. She na graduate of theatre arts for delta state university abraka,she na very funny and energetic person wen dey always be the life of anywhere wen she dey. She also be red carpet host,show promoter,social media influencer ,ambassador for pickmeup cab services and event manager l. She dey represent the plus size community wella and she get one passion to always enlighten and empower plus community nai make her dey organise one event yearly wen she tag plus size hangout with bigboldjenny. Genza Presenter Oghenero Ezaza aka Genza na presenter for Kpoko100.5FM. Dem born am for warri on June 10th. Anytime he dey on air so body go dey kpakpa am. He be writer and he don publish one book of poems wey the title na Reflections. Na im be the coordinator of one writing association wey dem dey call Warri Literary Society. BEMKO D TALKIS PRESENTER Just as I go talk am say, head wen don get oil don get oil, no matter how far you press am reach, oil nor go fit comot. Nah so I take waka enter radio. My name nah Igho Abegha and my friends and family still dey call me Bemko d talkis base on say nah wetin I don dey do right from childhood wen be to dey talk for fun and living. I be radio presenter, voice over artiste, Emcee and Pidgin English proverbial. My journey for inside radio start during my NYSC days for Abuja as the host of the programme wen dem dey call "Awa Mata" for Orientation Broadcasting Service (OBS). After my NYSC I come follow up big time now with my first love when be radio with one of my boss wen carry me gum body with am for Hot Fm 98.3 as he co-host for a about 2 years or so before I come decide say the time don reach for me to follow up on my own with the little experience and knowledge wen i don gather from there. By so doing, I con decide to move back to my state to go do wetin I sabi do wen be radio matas. Base on say dem say experience nah im be the best teacher, nah from there the M.D of JFM 95.1 take call me to come work with am as one of he presenters before I con say time don reach for me to join one of the best media houses for town for me to spark up my fire. From that process, nah there I con take join Crown Fm 93.7 where I come be the host of the "Inspirational Breakfast Show" and The "Weekend Breakfast Show" from Monday to Sunday's before the company come later transfer me to one of their branch for warri wen be Kpoko 100.5 Fm. Nah there finally I con sit down put as the oga kpatakpata of the "Sunday Evening Show". Base on say the ink for my biro don dey finish I nor go fit write much again... You fit connect with me any time any day for more gist.