Olokpa don gbab two men for inside Ogun State wey tiff one seven years old piken as dem dey try to collect moni ontop the boy head.
Na one Muhammed Abubakar wey be 42 years, and Clinton Niche wey be 18 years, and na Sunday Olokpa take gbab dem as the talk person for police DSP Abimbola Oyeyemi yarn, as e dey put mouth for the matta on Monday.
Na the papa of the boy piken, Stephen Ajibili nai go meet Olokpa for Agbara Area say Daniel Ajibili wey be seven years dem don tiff am.
According to the papa, na around 11:20 for morning wey the mama send am message nai dem take tiff am. Before the the tiff pipo come dey call dem to bring 1milla.
CSP Kayode Shedrack wey be the Area Commander for Agbara, nai come use hin commando style plus wetin the tiff pipo tell the boy papa and mama for where dem go drop the moni. The Olokpa pipo come hide for corna, na so dem take gbab the tiff pipo.
Na for tree dem tie the seven years piken and as Olokpa gbab the two, the other one wey dey look the piken shele. DSP Abimbola still talk say the Commissioner of Police wey never sitdon gidigba for the Commissioner chair, DCP Abiodun Alamutu, say make dem sharply carry the tiff pipo go where dem go dance ajasko to, as law talk.
Plus the third gang member wey run, Olokpa go purshu am enta hole bring am make he folow hin gang dance the music wey dem don play.