Court for Ekiti State don give bail to pastor Noah Abraham Adelegan wey get Christ High Commission Ministry, for Omuo Oke-Ekiti the church wey one karey pipo go heaven.
Pastor Abraham tell him church members say hin get pawa to karey dem go heaven and na Omuo-Ekiti nai rapture go take start, and for the members to fit enta heaven dem get to pay N310,000 as gate fee before the gate go open for dem.
This na wetin the court come read for am as dem karey am come the court: “You Pastor Noah Abraham Adelegan tell your church members on the 27 of April, inside Omuo Oke-Ekiti for Omuo Magisterial District, make dem pay moni to enta heaven. You use wayo take tiff from your church pipo N310,000 from one pesin.”
The police man wey karey the mata go for court, Inspector Johnson Okunade, say wetin the pastor do na against the law of the land.
While the lawyer to the pastor, Adunni Olanipekun, say abeg make court give bail to him client say hin go bring the two surety wey the court say make hin bring.
The Magistrate for the court, Titilola Olaolorun gree give am bail but say make the pastor pay N100,000 and two surety, plus dem go judge the case again for May 24.