APC don say to buy dem presidential nomination form na N70m and to show say pesin get interest for the position na N30m, total of the whole moni nai be N100m.
This big moni to take buy the form don put plenty tok for Nigeria pipo mouth say na just way to make young pipo and pipo wey nor too get nor even tink to smell president position.
The foma media aide to President Goodluck Jonathan, Reno Omokri, come dey ask for social media say “How APC go sitdon sotay dem sell president form for N100m? that one nor be corruption? Na which pesin for the kontri fit buy the form if nor be tiff? Oh nai make dem free Dariye and Nyame from prison so that dem fit sponsor form abei?”
Even Toripesin Adejumo Kabir for Twitter put mouth “Buhari nai say the N27.5m wey dem put for presidential form for 2014 too big, hin say na just to use moni anyhow. Today, na him even be the baba wey dey lead hin party to sell form for N100m. Shame for Buhari face.”
The mata of the form don put many chorchorchor for Twitter, but the oga director-general for Voice of Nigeria and still one of the pipo wey bring APC, Osita Okechukwu, say dem nor karey put the big moni for the form but na to make pipo wey nor serious nor near to resin the form.
Wey hin dey folow PUNCH tok for tellyphone call on Wednesday, Okechukwu say the resin why dem put that big moni na cus Buhari say na only the party go use dem moni take do the election.