Gospel musician wey just die, Osinachi, tori just get to know say be like the husband Peter Nwachukwu, bin don marry anoda wife before.
Nwachukwu marry one woman wey hin dey do lovi lovi with and Osinachi and her family pipo nor even know.
The relationship even start before Nwachukwu go marry Osinachi and the first woman get one piken for am.
All this one dey come out afta one of Osinachi piken say hin see one old pinsure wey he papa hide for hin room, and dem mama don dey tink before say be like say their papa dey folow anoda woman but she nor fit know how to find out.
The piken how hin take see the old pinsure say “Na one day wey my papa komot and hin forget to lock him room. Na so I enta, one spirit come tell me say make I just dey check tins for the room. I come see one old album, as I open am I see my papa old pinsure and I see say hin leave yeye life.
“I come close am, keep back for where my papa hide am. I nor fit tell my mama or any bodi, cus I nor want my papa to kill me if hin know say I see those pinsure. E get one time wey my mama bin wan find the pinsure for papa room, but she nor see anytin.”
Afta the piken don tok hin papa secret finish, Osinachi family pipo shock say Mr. Peter Nwachukwu don bin marry anoda woman for church before, and if to say dem know wey hin come to marry their sista 10 years ago dem for nor gree.
Police don already catch Peter Nwachukwu and dem go do test result to really know wetin kill Osinachi.