Presido for NFG, Mr Amaju Melvin Pinnick, don hear am for football stakeholders hand as dem say make hin sharply komot from that position as presido since hin nor know wetin to do there.
All this one na afta Nigeria Super Eagles nor qualify for 2022 Qatar World Cup wey dem play with Ghana Stars for Moshood Abiola National Stadium wey Presido Buhari even folow go watch.
To folow the mata, many football stakeholders say make NFF Presido, Pinnick and hin pipo wey dey work with am karey dem ekwakwa komot for the position as na dem cause why Super Eagles nor win.
But instead of dem to komot, na Austin Eguavoen and him technical crew nai dem pursue, and NFF come say dem go soon bring new coach for the senior team.
One Dr. Tijani Yusuf wey be foma seke of Nigeria Football Association, NFA, still join mouth say e don tay sef Pinnick suppose don leave that place not to talk of wetin hin do for 2015 and 2017 African Cup of Nation, and Tokyo Olympics 2020 too.