The Fediral Govimet of Nigeria through National Universities Commission dey tell any Nigerian pesin wey sabi make dem apply for Chevening scholarships, one program wey UK govimet dey do.
This tori dey come ontop of the strike wey ASUU dey for many months now.
According to Punch, na for leta wey the Deputy Executive Seketary, Administration of NUC, Chris Maiyaki, sign come send am to all vice-chancellors nai the informate dey.
The commission tok say, “National Universities Commission get the leta from Ministry of
Foreign Affairs, with Ref. TSW/BRI/V/T and na 12 August 2022, dem take write am with Call Leta from British High Commission Abuja wey dem join put and that one date na for 3rd of August 2022.”
The British High Commission don bin announce say make pipo come apply for Chevening Scholarships to take go read for obodo UK, e start for August 2, 2022 and go close for on November 1, 2022.
This Chevening Scholarships na full scholarship program to any bodi wey get wetin dem dey find to bring change.
So dem tok say dem write all the Vice-Chancellors, for quick and wide circulation to different universities. Pipo wey get mind to join make dem submit dem application for www.chevening.org/apply.
All the information wey pesin need to know who go fit apply for the scholarship still dey for www.chevening.org/scholarships.