Pipo wey dey quench fire for Lagos, no be small battle dem dey to off fire wey dey burn three storey building for Mushin afta petrol tanker explode near filling station.
With tori wey land from Daily Trust, the tanker dey offload fuel of 33,000 liter for Mobil Filling Station around 1’Oclock wey the tanker just catch fire come spread enta the building wey near am.
But Ibrahim Farinloye, the National Emergency Management Agency pesin wey dey organise tins, say nor bodi die for the fire wey happen opposite Alakara Police station for Mushin inside Lagos.
Dem dey try to make sure say the three storey building nor reach ground. Na only small tins pipo don fit save.
Lagos State Fire and Rescue Service say make pipo wey dey drive motor nor pass Idi Oro Corridor for Agege Motor Road, Mushin, but go find anoda road pass for naw.