+ 234 909 771 1005


Follow Us:

Tenant drag landlord gbola till the man kpuff because of light bill



One 33-year-old woman wen dem dey call Ifeoma Ossai don kpuff her 50-year-old landlord, Monday Oladele becos of their quanta for the Sango-Ota area of Ogun State.

According to report, during the casala wen come lead to fight, the suspect grab her landlord gbola and na so she drag am drag am till he denkwes.

The Police Public Relations Officer, Ogun State Command, SP Abimbola Oyeyemi wen yarn dis one for inside one statement on Tuesday come talk say olokpa dem don arrest the suspect after report about the matter show for the Sango-Ota Divisional Headquarters.

The police otota come talk say the police receive hint from one Olaleye Taiwo, when report say him brother, Oladele, get gbege with him tenant becos of the payment of light bill.

According to Oyeyemi, during the disagreement, the tenant grab the man gbola and na so she drag am till he delete.

According to the statement, as that one happen, the landlord come fall for ground, den he come dey unconscious, dem come rush am go General Hospital, Ota where the doctor wen dey on duty come confirm am say he don kpeff.

Oyeyemi come talk say the DPO, Sango Ota Division, CSP Saleh Dahiru, lead him detectives go the scene where them for take arrest the suspect, den dem come arrest am for investigation.

He say as dem dey question her, the suspect claim say the landlord wen don denkwes so ask her to pay the light bill, but she come dey hold ground say until d landlord connect water directly enter her apartment as he take promise before she pack enter, she no go pay the light bill or any other utility bill.

“This one so nia come lead to the gbege between them and na dis one so nia come make the suspect grab the landlord gbola den she come drag am with am.

“The late man come collapse, dem rush am go hospital but the doctor wen dey on duty come talk say he don already kpeff”

Like dis, dem don carry d dead body put for the hospital mortuary for autopsy.

Meanwhile, the PPRO say the state Commissioner of Police, Frank Mba, don order the immediate transfer of the suspect to the Homicide Section of the State Criminal Investigation Department for more investigation and prosecution.


Share On:

Leave a Reply

Your email address will not be published. Required fields are marked *

Contact Info

Quick Links

Make E beta for you

Advertise with Us

© 2022 KpokoFM