Early morning on Sunday nai some gunmen go kill three police man wey dey patrol for Okpanam inside Oshimili LGA for Delta State.
Security dem say the DPO of Okpanam get call from the community leader say some pipo come attack the vigilante team for the street.
Nai oga DPO come send four of hin police officer go the place.
But as the Olokpa police dey drive come out from dem station, nai some men with gun use bullet take face dem, instanter nai three of the police man die for ground.
The pipo wey die na ASP Eke Francis, Inspector Joshua Akengbo and Corporal Perekedo Unene.
And the gunmen tiff two AK-47 of the police wey die.
The last police man wey be the fourth pesin, Bassey Wisdom, dem dey treat am for hospital.
State Police Public Relations Officer, DSP Bright Edafe, neva tok about the mata by the time the Tori come out from Punch.