EFCC say dem dey find Nigeria popular Instagram celebrity, Ismaila Mustapha, aka Mompha.
The commission say any Nigerian wey know where Mompha dey, make hin tok or go any police station wey near am to report.
Na on Wednesday for Twitter nai EFCC take write so.
Dem karey Mompha and hin company, Ismalob Global Investment Ltd, go court for wayo moni mata.
EFCC say him and hin company tiff N6 billion for January 12.
For the new case EFCC say Mompha use wayo take colet plenty moni.
The other case na hin dey use property wey he use jibity take get, wayo document wey nor really show he true sef, and nor gree tok the numba of property wey hin get.
Court come keep am for EFCC station but later say make hin pay N200 million as bail fee but he nor fit pay am.
For June 10, nai the agency say Mompha go against court order, use anoda new passport travel go Dubai.
As the mata come tie wrapper nai court for Lagos, for June 22, say dem don cancel the bail wey dem give Mompha as hin nor show for hin case for court.