Olorogun Kenneth Gbagi say hin get mind to be govinor for Delta state under PDP canopy and hin go work with the four point agenda wey Itsekiri pipo get, so that the three local govimet for Warri go get development if dem vote am as govinor for 2023.
This one na afta Pastor Ayo Oritsejafor for Word of Life Bible Church, talk for thanksgiving wey Iwere pipo do say make king Ogiame Atuwaste III, tell hin pipo make dem bend low for God as dem work with four point agenda to see Iwere pipo join togeda.
Na that line na Olorogun Gbagi pick say hin go use as he go visit Chief Andy Osawota for hin house for Effurun. And as Chief Osawota get strength Gbagi want make him stand with am to make sure say Delta state correct for every kona.
Cus as e dey so, Nigeria dey bite finger for the APC mistake wey dem bring come govimet, na wetin Gbagi talk.
He come still say all the work wey PDP don do before for ground, APC don dagbaru dem and that kind tin dem nor want am for Delta state.
“The luck wey Delta get be say Okowa na pesin wey get eye. See where we don reach for the state naw, nai make we go like folow hin step.”