Fediral Govimet don use hand and chest take cova demsef on Wednesday for the N1.15bn wey dem use take go buy 10 SUVs motor for Republic of Niger.
Dem say the resin na make the kontri for fit keep dem territory well for the good of Nigeria security.
Afta dem finish Fediral Executive Council meeting wey Oga President Buhari be chairman, nai the Minister of Finance, Budget and National planning, Zainab Ahmed, tell State House News pipo say this one nor be the first time wey Nigeria dey epp kontri wey near am.
She say president fit do like this cus na for the good of the kontri.
Sahara Reporters bin bring one report on Wednesday for June wey say President, Major General Muhammadu Buhari (retd.), approve N1.15bn to buy 10 Toyota Land Cruiser V8 motor for Nigerian government.
The record na from the page of the Ministry website nai dem take get am for July 2022, and na N1,145,000,000 nai dem approve to take pay one Kaura Motors Nigeria Limited to supply the SUVs.
And na February nai president Buhari stamp say make dem karey the moni.
As the news bust out e don make many pipo for Nigeria dey parasid say kontri nor get moni but govimet see eye take dey karey give other pipo.
But on Wednesday, nai Finance Minister dey tok say Nigeria don bin get epp from other kontri wey dey close to am before.
“This nor be the first time wey Nigeria dey epp Niger, Cameroon, or Chad, and president see say e dey good base on wetin the president from there ask, and we go ansa dem to protect dem territory cus e still concern Nigeria security.
“Nigerians get right to ask kweshun, but the president get right too to know wetin be the best for the kontri interest, and I nor fit ask am kweshun.”