We Nor Go Vote For PDP If- Isoko Leaders

 

The leaders wey dey for Isoko inside Delta State say as e dey be, be like dem nor go vote for PDP for 2023 general election as the Ughelli/Ozoro Asaba express road and Oleh/Irri road don see shege for the state govimet hand.

Afta the leaders, do meeting finish nai the Isoko Development Union, IDU, Isoko kings, clans/ Kingdoms president general, captains for industry and politicaians for Isoko nation write say dem nor just dey happy with wetin Ifeanyi Okowa dey do ontop the N10m moni wey hin suppose dey pay Isoko youths every month for social security.

For wetin dem write the IDU President-General, Prof. Chris Akpotu and other of dem say dem dey vex for Okowa as hin nor dey gree give face to the executive bodi of Isoko Nation, IDU, since December 2020 wey dem stamp dem put.

“Na show of no respect to us be this even as the president general and hin executives don try reach, we nor go take this nonsense again.

“Make Delta State Govimet quickly do the bad road for Isoko land, especially the one for Ughelli, Ozoro, Asaba express road and Oleh/Irri road wey dem abandon since.

“We nor like the way govinor just quiet like who nor dey tok about the N10 million Isoko social security fund wey be for youths even with the many many times wey we don waka ontop this mata.”

The leta say make Okowa do quick to ansa so that peace wey dey with PDP and Isoko Nation since 1999 wey dem dey win all election nor go scatter yamuka for ground.

 

Share On:

Add a Comment

Your email address will not be published. Required fields are marked *