Some wayo pipo don go do anoda telephone nuba wey resemble the chairman of PDP for Delta State, Kingsley Esiso, take dey send message to pipo to bring moni.
The tiff pipo double the phone nuba, dey use am send message to those wey wan be govinor say make dem send big big moni wey go make dem get the party ticket.
For wetin the Executive Assistant to the govinor of Delta State ontop Communications, Fred Latimore, tok on Tuesday, say make any pesin for the party wey wan be govinor nor resin am say dem wan go give any moni to any pesin as na yahoo yahoo boys nai just wan chop dem moni so.
Latimore say “PDP chairmo for the state don cry say yahoo boys dey go use hin nuba take dey send PDP govinor pipo make dem bring moni to buy ticket as the primary go soon come happen for May 7, 2022.
“The chairman say the wayorist nuba na 0703 503 6524, but when dem use True Caller app take check am, e dey show Esiso name say na hin get the nuba.”
“Many senior men for awa party get the message, say make dem pay big moni for ticket.
“We dey work with law pipo to make sure say we catch this bad boys. And dem go hear word for this tin wey dem don do.”