The Independent National Electoral Commission, INEC don declare Monday Okpebholo, candidate of the All Progressives Congress (APC) as the winner of the Edo state governorship election.
Na Farouk Adamu, INEC returning officer nia announce the results for Benin City, the Edo state capital, on Sunday.
Okpebholo wen be senator win the election with 291,667 votes to beat him closest rival, Asue Ighodalo of the Peoples Democratic Party (PDP), when get 247,274 votes while
Olumide Akpata, candidate of the Labour Party (LP), come carry distant third with 22, 763 votes
Meanwhile, the Governor of Edo State, Godwin Obaseki don tell him party and supporters to dey calm and make dem no break the law after the Independent National Electoral Commission (INEC) declare the All Progressives Congress candidate, Senator Monday Okpebohlo as d winner of the Edo State governorship Election.
Godwin Obaseki yarn this one for one live Nation Broadcast for Benin City. He come talk say ojoro full the Edo State Election.He talk say the result of the September 21st Governorship election for the State don weaken the spirit of many Edo people.
Ontop this matter, one odon for the All Progressives Congress for Edo State, Chief Charles Idahosa don blast Obaseki say make he stop to dey blame institutions wen dey there to make sure say the election for the State dey free and fair.
Idahosa come talk say dis one na the first time wen Governor Godwin Obaseki dey contest election alone without anybody to support am even for him own party.
