The Delta State Police Command don recover one AK-47 rifle and 26 rounds of live ammunition after one gun gbege between operatives and suspected kidnappers and armed robbers for Ughelli North Local Government Area of the state.
Delta State Police Public Relations Officer (PPRO) SP Bright Edafe wen drop dis update for one statement talk say on 31st October 2026, around 2035hrs, operatives of the CP Special Assignment Team (CP-SAT), wen collabo with the Ughelli Vigilante, act on credible intelligence, raid one suspected criminal hideout for one forest for Ekrerhavwe for Ughelli North local government area.
As soon as the suspects sight the operatives, them come begin dey shoot and na dis one come cause the gun gbege where two suspects for take sustain gunshot injuries, while others run enter the forest.
Them carry the suspects wen injure go one hospital, where the doctor for take confirm am say dem don legoo.
Edafe say dem recover one AK-47 rifle, 26 rounds of live ammunition and two face masks during the operation.
The Commissioner of Police, Delta State Command, CP Samuel E. Erale come talk say the command dey committed to fighting kidnapping, armed robbery and other violent crimes for across the State.
He come tell residents say make dem dey shine their eye and say make dem continue to dey provide ogbonge informate to support police operations.
Meanwhile, efforts dey on to cramp the suspects wen tule.