Floodwater carry one university undergraduate for Asaba, Delta State, when she dey travel with her popsi for inside weToyota Corolla and na so the flood push the motor enter one drainage channel.
The okamuka happen on Monday for Okotimi Layout, wen dey for the back of the Asaba Specialist Hospital, after better rain fall.
One source say the man been dey carry him daughter dey go the location where she go for undergo her industrial training when the okpetu take happen.
The source say the girl wen siddon for the front of the motor, raise her hand, then she come call for help before the floodwater carry her go.
The Delta State Emergency Management Agency SEMA, under the Ministry of Bureau for Special Duties, confirm the matter.
The Commissioner for the Bureau of Special Duties, Ejiro Terry Etacherure, say SEMA start to dey search for the girl on Monday and dem come engage divers to assist for the operation.
He say the search continue until on Wednesday, when boat operators for the Otogwu River axis of Anwai Road alert the agency after dem discover one body wen dey float.
The commissioner say dem contact one family member to identify the body, and he say one ambulance from the Asaba Specialist Hospital don carry the remains go the hospital mortuary.