The Office of the Sole Representative To the Olu of Warri Liason to Nigeria National Petroleum Company Limited ,NNPCL, on Sunday organize One day seminar for social media activists and influencers for Warri Kingdom with d focus to use social media take drive cultural and economic growth for the Warri,kingdom. The event when hold for Otonloye Hall, Ugbori Community for Warri South Local Government Area of Delta state get more than one hundred social media influencers from Warri kingdom wen mark present. When d Sole Representative of the Olu of Warri to the NNPCL, Collins Oritsetimeyin Edema, wen Ben Eburajolo represent come dey yarn during the seminar, he come talk say social media na powerful tool wen dem go fit use take promote peace, settle gbege and promote economic prosperity for Warri.
Warri Fada Bin Don Pack Bag Bifor, Gambia Priest
One Fada for Gambia, Rev. Fr. Kelvin Ugwu don tok wetin hin know about di case of Rev. Fr. Daniel Okanatotor Oghenerukevwe wey dey get case upandan about why he komot from priest work go dey follow woman. For post wey Fada Ugwu put for Facebook nai he take say make pipo know wetin dem dey tok as di marriage of Fada Oghenerukevwe nor be hide and seek as di man don already write say he leave di work. Remeber say everytin start wet circular from Catholic Diocese of Warri, Delta State, on Sunday write say dem don suspend Fr. Oghenerukevwe cus he still dey work as priest but hide go do marriage for United States of America, USA. Fada Ugwu come dey tell pipo to open eye for di kind news wey dem dey read cus Fada Oghenerukevwe nor lie but na cus he nor wait for di normal process to stop di priest work, cus if pesin say he nor want be priest again nor bodi go force am.
Govinor Adeleke Nor Gree Court To Kill Man Wey Tiff Fawo
Govinor Ademola Adeleke of Osun State don put mouth for di case of one man wey court say he go die by hanging cus of fawo wey he tiff, di Govinor say di jorjimet nor just make sense. Di Govinor say make di Attorney General quickly come put mouth to allow di man fit comot from prison bifor dis year go finish. Na for statement thru he tokpesin, Olawale Rasheed, nai Adeleke take say Osun na land wey dey resin Justice and how everybodi go take dey equal, so dis kind jorjimet nor fit work. He come tell di pipo for di state make dem mind come down as di mata na urgent one but for sure say di young man nor go just die like that cus he tiff fawo.
Mama Kill Her Pikin For Aviara River
Delta State Police don arrest one woman wey be Blessing Ibuku cus she go kill her baby wey be just 10 months for notin sake. For December 4, nai dem karey case to police say baby Prevail Jonathan dey loss as dem still dey for station nai dem get call say one pikin deadi bodi dey float for Aviara village river. On Tuesday nai State Commisoner, CP Abaniwonda Olufemi tell tori pipo say as dem go bring di baby come nai dem see say na di same pikin wey dem don dey find. As dem do kwestun reach Blessing nai she confess say nail she kill di pikin on November 31, 2024 as she throw am inside water cus of shame wey her friends dey laugh so pikin say he nor get papa.
We Don Catch Marketer of Fake Amoxicillin Capsule — NAFDAC
Managing Director of Divine Kings Pharmacy Limited, Kingsley Ekeanyanwu don enta police net acts NAFDAC catch am cus of di fake Deekins Amoxycillin 500mg capsule wey bin dey for market. Pipo wey bin take di mericin no be small shout dem complain about different tin for dem bodi until NAFDAC come kolet di drugs from market on Wednesday. But wey Prof Mojisola Adeyeye dey tok to tori pipo on Thursday for Abuja, she say dem don catch Mr Kingsley and he dey for police station. Dem don still karey di drugs go lab to test am, while Pharm. Ekene Christopher, Ecomed Pharma Ltd and Mr. Kingsley Ekeanyanwu wey get Devine Kings Pharmaceutical Ltd all of dem go hear word as dem don still tell pipo wey still get di drugs for haux to troway am.
I Nor Be Nigeria Tokpesin, Kemi Badenoch Reply Shetimma
As Vice President Kashim Shetimma don use word blow Olukemi Badenoch for obodo UK say she nor get respect for kontri wey she come from, she don drop her own wotowoto say na only true be her message. Kemi na di new leader for Conservative Party Leader and bifor then, any small chance she dey tok about di problem wey she face for Nigeria as she dey grow with many tiff and bad tins. Na those her tok come make VP Shetimma say instead of her to dey tom bad about Nigeria anyhow, e go beta make she remove Kemi from her name. But di opposition leadet for UK don tok thru her tokpesin say her work nor be to be Nigeria PA but na to focus on her new leadership role for UK.
Court Don Send 18 years Wey Tiff Agbo To Prison
One Magistrate Court for Jos, Plateau State don sentence Joshua Gowol, to six months prison cus he go tiff agbo mericin. On Wednesday nai di judge of di court Shawomi Bokkos say make di 18 years boy wey dey sell tins go cool off for prison afta he accept say he really tiff di agbo. Joshua bin go break one Mary Michael shop tiff but she come karey di mata go report for Anglo-Jos Police Station on November 18th, wey she see di agbo for Joshua’s hand as she dey go back to haux from work. As police officer Ijuptil Thiawur come take di mata to court nai Magistrate Bokkos say make Joshua go prison for six months or pay N30,000 as fine.
Okuama Treasurer Don Die Afta Presido General Die For Military Cell
Seven days ultimatum wey Okuama community give say make govimet gree dem leaders and di President General of di community deadi bodi wey die for military hand, anoda one don hapun again. E never tay wey Okuama cry come out say Pa James Oghoroko die, Dennis Okugbaye wey be di community treasurer don still die for military hand. No be small fear deg di pipo bodi cus na six days nai back nai PG die and now treasurer dey follow, dem say make President Bola Tinubu and Army ready to finish all di village pipo as dem go really go block di water. As di 81 years man die na di son wey be Pastor Akpos Okugbaye, nai annonce am on Tuesday say he papa don die and still others dey cry for military cell.
Kano Police Arrest Teree With Fake Different Kontri Moni
Teree pipo wey get fake moni wey reach N129,542,826,000 nai police for Kano State don catch join with di pesin wey dem go tiff di fake moni from. Na on Tuesday nai di command take say na total of 3,366,000 US dollars, 51,970,000 francs CFA and 1,443,000 naira. Two of di suspects wey tiff di fake moni join with di pesin wey dem tiff am from dey with police as dem dey do investigation on who dey produce di fake moni. Public Relations Officer, SP Abdullahi Haruna, say nor be only di fake moni dem see as even six live ammunition, teree keke, eight okada, teree parcels wey 175 wraps of dry leaves wey be like higbo dey, 250 diazepam tablets, 278 sheep, and 7 cow. Di tok pesin say tins like kidnap, army robbas, jaguda and pipo wey dey sell drugs don dey run find where dem go hide.
E Betta Make You Change Your Name From Kemi, VP Shetimma Tell Kemi Badenoch
Vice Presido, Kashim Shetimma don say many pipo wey dey japa especially Nigerians dey epp obodo oyibo kontri economy beta. All di plenty tok start wey VP Shetimma dey trow blow for Kemi Bandeco di new Conservative Party leader for UK, as she dey do wan kind dey shift bodi from Nigeria wey she come from. Kemi bin don curse Nigeria leaders for 2022 say dem nor get sense as na only to dey tiff public moni dey use for dem sef nai dem sabi. But on Monday for Abuja during di 10th Annual Migration Dialogue for State House, Shetimma congratulate Kemi but say he nor like di way she dey do, make she kukuma komot di Kemi from her name and face front. Because afta Kemi enta position nai Nigeria Govimet thru di chairman of Nigerians in Diaspora Commission, NIDCOM, send message to Kemi office but till today di woman nor ansa Nigeria.