Warri youths

Youths for Delta say dem nor go gree why FCT go Scatter Kpokpogri house

On Tuesday some pipo go do we nor go gree for Joseph Egbri wey be Kpokpogri cus of hin house wey dem scatter for Abuja, on Wednesday anoda group wey say dem be Niger Delta Youths Solidarity Movement come still match to do dem own.

Dem hold different paper, some of dem write say make Govinor Okowa of Delta State and Deputy President of  Senate, Ovie Omo-Agege, nor just kip quiet as pipo just dey oppress their piken for Abuja.

Na for Abuja federal housing authority, nai the group go dey do we nor go gree, una must pay Kpokpogri back.

FCT Admin don bin tok through the aide of FCT, Minister Muhammed Bello say Kpokpogri house dey for major express road nai make dem scatter am.

Alh Ahmed Idris

Suspension leta for Oga Hakantant ontop N80b wayo

The Minister for Finance, Budget and National Planning, wey be Mrs. Zainab Ahmed, don suspend the hakantant general of the kontri, Mr. Ahmed Idris, for the N80b wey EFCC say hin gbaskele.

The minister say make Idris go rest first untill dem finish investigation about the missing moni.

Na on Monday nai EFCC arrest Idris ontop N80b wey hin neva fit tok as hin use the kontri moni pass.

EFCC Tokpesin, Wilson Uwujaren say the moni so na real estate for Kano and Abuja nai Idris launch am put.

NDLEA

Warri drug madam don enta NDLEA net

59 years Bridget Oghenekevwe Emeka wey pipo know as Mama don land for NDLEA hand as na she be the major madam of drugs for Delta State and some oda State wey dey around.

NDLEA arrest her for May 15 for her big house where she take dey make cocaine, Methamphetamine and some oda bad bad drugs.

Tokpesin of NDLEA, Femi Babafemi, on Tuesday for Abuja nai day dem don fit catch like nine pipo wey dey work with her plus the madam join, for where she take take do the drugs and kip am for Warri, Delta State.

NDLEA say apart from the cocaine, Methamphetamine, Molly, wey dem seize from her, dem see one pump-action gun, 15 cartridges, documents, two motor, many tellyphone, wetin dem take dey do drug and dem dey look into the mata.

“Five of her worker nai dey cook, cut and distribute the package, dem catch dem for her house wey dey Favour Street, for Otukutu, Effurun Warri, four of her collabo too dem catch dem for some oda side of the town,” Wetin Babafemi tok.

Hin say dem don dey find the woman for many weeks naw cus na she dey sell and distribute cocaine wey dem don cook to crack cocaine for different joints.

Many tins wey dem see for her house na sodium bicarbonate, the main koko to use take do crack cocaine and the white plastic to take wrap am.

Men with guns

Gunmen say Dem go Attack Nine Local Govimet for Anambra

Ungun known men don write anoda leta go give nine Local Govimet for Anambra wey dem wan go attack.

Na Ihiala, Aguata, Nnewi South, Awka North, Awka South, Idemili North, Idemili South, Orumba South, Orumba North and Anambra East, nai be the place wey dem say dem go attack.

The group write for the message say make security pipo ready for wetin dem go do for Biafra Land.

Dem say make the local govimet wait for dem as dem dey show. And dem dey warn Professor wey be the state govinor say this time nor be for big big English but action time.

For the warning wey the group write, dem say make the govinor go tell President to release their oga, Onyendu, Mazi Nnamdi Kanu, or na to dey see war everyday.

The police PRO for the State, Tochukwu Ikenga, say police and oda security pipo dey tanda for ground, so tye pipo nor fear.

Kano blast

Blast for Kano, Fear dey Weda Pipo Die

Gbosa blast happen for one private skool wey dey for Sabon Gari, place wey pipo wey be different tribe dey stay pass, and e dey for Aba road for Kano State.

Some Tori say na Gas nai blow other pipo dey say na bomb and e scatter one building wey pipo dey stay plus the skool.

NEMA, police, NSCDC, army, and fire service dey do dem work to make sure say tins nor worse.

But Kano State Govimet say the blast nor happen for the skool. Even the State Commissioner for Information, Muhammad Garba, say na where dem take dey kip animal food wey face the skool for Aba Road inside the state nai e take happen but dem neva know how tins bad reach.

Garba say make pipo for the area chilax as govimet go check wetin happen and let dem know, but for naw make dem mind come down.

Alh Ahmed Idris

Hkantant wey dey kip kontri moni, dey ansa N80b case for EFCC hand

EFCC don catch the hakantant general of Nigeria, Mr  Ahmed Idris, on Monday say hin tiff N80bn.

Na the Commission show say the AGF gbaskele the moni through different kind wayo way and even use friend and family sef take colobi the cash.

Dem put the moni for real estate business for Kano and Abuja.

EFCC arrest Mr. Idris afta dem call am hin come dem office come clear hinsef for mata wey concern wayo way but omoguy nor gree show face.

Leo Mezie

Leo Mezie don kpai

Nigerian film actor,  Leo Mezie, don die for 46 years. He real name na Leonard Chimezie Onyemachi, tori get am say na Saturday nai hin die afta he don do kidney operation finish.

Na on Monday nai Chioma Toplis for her Instagram take say the man die for one hospital for Abuja.

As she dey put some of Leo Mezie pinsure, Toplis write say, “Actor Leo Mezie don die. Na Saturday hin die for Abuja afta kidney operation and dem don karey the bodi go umuahia to take bury am.”

Na 1996 nai Leo Mezie take start to dey act film but pipo know am well for 2003 afta hin act Labista.

For 2010, Leo marry hin wife Maureen. While for 2016 nai he come out tok say he get kidney problem before pipo come gather moni for am to go do operation for London.

But as mata come be, for 2019 nai the sickness come again, dem come karey am go hospital for Lagos to treatment am before hin dey die on Saturday so.

Kano State

Kidnappers don kill 6pipo for Kano and tiff king

Some gunmen wey be like say dem be kidnapper don kill six pesin for one village for Takai Kano state.

The kidnapper enta Karfi village for the same LGA tiff one 53 years man wey be the head of the village, Abdulyahyah Ilo.

Dem say dem come with three okada to the village from Bauchi state pass through Ringim forest for Jigawa.

The men don bin dey komot from the village afta dem tiff the king, wey the village pipo come organise vigilante and some young pipo to go find dem.

As the gunmen see say dem dey pursue dem nai dem start to shoot the nine youth and vigilante, out of dem six don die and three dey hospital dey take treatment.

Tokpesin of police for Kano, SP Abdullahi Haruna Kiyawa confimate the mata and dem don send police go the village why dem dey try to safe the king.

Indian bride

Una must born grandpiken or pay us awa moni wey we spend for skool, boy papa and mama

No be small film nai play for north Indian state for Uttarakhand as one man and hin wife karey dem piken go court cus the piken wife neva fit born for six years wey dem marry her.

The husband and wife say dem plan am before say wey dem stop work by that time their piken don born grand piken wey go dey folow dem play for house.

Parents of the boy say na dem head nai this children take dey play, so dem come karey the mata go court, but the boy piken and the wife nor tok anytin for the mata.

The boy mama wey be Sanjeev and hin papa na Sadhana Prasad, Dem say na all their moni dem use take train their only boy piken to skool make hin go read how to be pilot, come even epp am for marriage.

The papa Prasad say hin  use $65,000 take send the son go pilot skool for US for said 2006. Wey hin come back to India 2007, he not come get work na hin papa and mama come epp am for two years untill the piken Shrey Saga come get anoda pilot work.

2016 nai hin papa and mama come do arrange marriage for am so that dem piken go fit born before dem stop work, but for where the wife nor dey get belle.

With wetin BBC tok the papa and mama of the boy say dem piken go pay dem $650,000 if dem nor get any grandpiken before this year finish.

Atiku Abubarkar

Atiku delete posts about the way dem take kill Deborah

Pesin wey get mind to be president for the kontri for 2023 from PDP, Atiku Abubakar, don delete all the message wey hin write for social media about Deborah Samuel one christian girl wey be student of Shehu Shagari College of Education wey die.

Muslim boys for the skool kill Deborah on Thursday morning come put fire for her bodi cus dem say she tok against their Prophet Mohammed.

Nai Atiku come enta social media on Thursday evening o, say justice must to come for Deborah.

This na wetin hin write “For this kind way wey dem take kill this girl, justice must be done. Dem kill Deborah and the pipo wey do this one shai, dem must face the music. I dey greet the family and friend of Deborah make dem nor cry again,” This nai be wetin  Atiku write for Facebook and Twitter.

Afta hin don write finish, some hours time nai Atiku delete the message as some bad Muslim pipo come dey threaten am say dem nor go vote for am for 2023.

Many of the pipo wey tok for Facebook say dem nor go vote for Atiku as hin don already loose before the election start, cus he go dey say why dem go kill Deborah.

Na around 10:20 for night nai Atiku take delete the message wey e neva even reach one hour wey hin write am put for social media, before hin come put anoda one say not be hin write the message.