police

Police Say No Attack For Abia  SCID

 

 Abia State Police command say the news wey come out dey fly say some gunmen go attack the State Criminal Investigation Department, SCID, for Umuahia na lie.

Na Wednesday evening nai tori come out say the gunmen attack the SCID, enta where dem dey keep gun and even injure three police.

But Police Public Relations Officer for Abia State Command, SP Geoffrey Ogbonna, tell Vanguard say the bad guys only attack police men wey dey do stop and search for Uzuakoli area for Umuahia.

He say na only two police injure and the bad guys nor even near SCID as tori karey am.

Last year gunmen attack the state CID, burn the place and free some pipo wey police detain.

 

Before Deputy Senate President Ike Ekweremadu

Make Anoda Pesin Take Ekweremadu Senator Seat, Lawyer Tell Court

Before Deputy Senate President Ike Ekweremadu

 

One lawyer for Enugu State Ogochukwu Onyema, and hin come from the same senatorial district of foma Deputy Senate President, Senator Ike Ekweremadu, go meet Fediral High Court for Enugu make dem put vacant position for Ekweremadu seat.

Ekweremadu nai be the serving senator from Enugu West constituency and hin dey detention for UK cus of kidney wey he wan use one boy own take give hin piken before the boy come go report to police for UK.

The lawyer dey beg the court make dem say Ekweremadu seat dey vacant since hin dey face case onto kidney trafficking mata.

Onyeama say the seat nor fit just dey like that as Ekweremadu still dey detention for UK.

Bola Ahmed Tinubu

2023 Na Tinubu Go Get Delta – Support group

 

 

The chapter wey dey support Tinubu Organisation for Delta State, say dem don put tins in place to mobilize pipo wey go support APC and Bola Tinubu for 2023 election.

Philip Kachukwu nai be the State Coordinator, tok so for Asaba as hin dey tell the group wetin dey their front, hin say the group go gather pipo from top to bottom for Tinubu for 2023.

He say for the three candidates na Tinubu qualify pass cus hin get wetin e take to take fix Nigeria.

The issue of Muslim-Muslim ticket, wey pipo dey cry, APC nor be religious party and that one nor even mata. Na the message wey we karey to tell pipo for grassroots.

Kachukwu say the way pipo dey karey Obi for head like gala against Tinubu and Atiku nor just show the general behavior of Nigerians.

 

asuu strike

Court Say Make ASUU Stop Strike Now

 

 

The National Industrial Court of Nigeria (NICN) say before dem close eye open am make ASUU stop the strike wey dem dey do naw.

ASUU don dey strike since February 14 2022, so that govimet go make put beta monie for universities, increase lecturers salaries, with other tins.

Different meeting nai ASUU and Fediral Govimet don do since the strike start but all the meeting neva fit get head and tail.

Because of the strike wahala nai Fediral Govimet karey ASUU go court.

Govimet through dem counsel, James Igwe come dey beg the court make dem put order to make ASUU nor kwatinue with the strike untill the case finish.

 

 

WIKE-ATIKU

PDP Gbege: Wike And Padis Shift From  Atiku Presidential Campaign Council

 

 

The gbege wey dey happen for Peoples Democratic Party don turn anoda leg on Wednesday, as Gov Nyesom Wike for Rivers State and those wey gum bodi with am for the state say dem nor go join the presidential campaign council of Atiku Abubakar.

Na for last week here nai PDP announce say na Gov Udom Emmanuel of Akwa Ibom State nai go be the campaign council chairman.

Know say Atiku and Wike don dey trow blow since about the case of say make dem remove Senator Iyorchia Ayu as the National Chairman of PDP.

So for meeting wey dem do for Port Harcourt nai one insider tell Vanguard say Wike and hin loyalist don gree say dem nor go join the campaign council cus e nor karey everybodi along.

Pipo wey dey for the meeting na Govors like Nyesom Wike of Rivers State, Seyi Makinde of Oyo State, foma Plateau State Govinor, Mr Jonah Jang; foma Ondo State Govinor, Dr Olusegun Mimiko; the foma Govinor for Ekiti State, Mr Ayodele Fayose and some other Govinorship candidates join with others.

 

IMO STATE UNIVERSITY

ASUU Strike: We Don Open Again- Imo State University

 

Management for Imo State University, IMSU, on Monday say dem dey shift bodi comot from ASUU strike and dem don start academic session.

The skool tell toripipo for Owerri through the University PRO, Ralph Njoku.

The PRO say the resin why the skool comot bodi na cus students dey waste time plus even the ones wey just apply and neva fit enta the skool, make dem nor go loose for every kona.

But hin say the skool nor get any problem with ASUU but the resin why dem shift na cus dem nor want make the next generation see shege.

And as dem open any lecturer wey like fit come back to come teach.

Njoku say dem neva fit ansa 2022 set wey apply finish so that dem fit do matriculation now 2022/2023 session dey come where dem wan hang dem put.

“If we kwatinue to dey waste time we go miss pipo wey really like university, nai make we stand gidigba face the melu use e horn take hold am.”

 

Bola Ahmed Tinubu

APC Youth Leader Say Young Pipo Want Tinubu as President

 

All Progressives Congress National Youth Leader, Dayo Israel, say Nigerian youths dey for the back of Bola Tinubu the party presidential candidate.

Na on Monday, 19 September, 2022, nai the national committee member take tok so for Abuja wey dem dey do  Progressives Young Leaders Summit.

Israel say e nor dey check APC mind as some politicians dey use some pipo take dey paint Tinubu black paint for social media.

He say many Nigerian pipo don really get epp with Trader Moni Programme and grant wey govimet give young entrepreneurs.

Israel come still say the young pipo wey dey with APC na uncountable and dem happy with dem as NAN report.

“Make una nor listen to wetin pipo for outside dey tok say APC nor get young pipo, all those one na lie.”

 

 

GRIDLOCK IN LAGOS

NANS Block Lagos Airport Cus Of ASUU Strike

 

 

Student dey provocate the National Association of Nigerian Students do go block Murtala Muhammed International Airport for Lagos to show how dem dey vex reach about ASUU and govimet.

The strike don dey for seven months naw and belle now dey sweet dem again.

NANS bin don tok say dem go block international airport for the kontri from Monday, September 18, 2022, cus of how the strike don tay reach.

Dem say the resin wey make dem go block airport na cus since dem dey block main road e dey go well nai make dem come block airport.

The leadership of NANS, tok for Ondo State, say the resin why dem go block airport na to make sure say the rich too feel the pain wey students dey pass through since the strike start.

While the chairman of NANS National Task Force for ‘End ASUU Strike Now,’ Ojo Raymond Olumide, say the strike don belleful students nai make dem dey beg make govimet and ASUU come to agreement.

Olumide come still say make ASUU nor resin am to call off the strike afta govimet don increase dem salary but still fulfill the other tins wey ASUU dey ask of.

 

 

CSP-Olumuyiwa-Adejobi

You Nor Get Any Right To Fight Olokpa Wey Wear Uniform- PRO

 

The PRO of Police Force, CSP Olumuyiwa Adejobi, say no Nigerian pesin get right to fight any olokpa even if the police slap am.

Na for Twitter nai the PRO take dey tok so. He say anybodi wey get kwanta with police e go beta make the pesin go report the case with police instead.

The resin wey make Adejobi dey tok about this na one video wey dey fly with one man wey dey drag gun with one policeman as dem dey quarrel cus the police go dey check hin phone.

He say anybodi wey fight police wey wear uniform that one na just to show say you nor dey respect Nigeria nor be even the policeman.

He say the case nor go be again wetin the policeman do but why the pesin go fight police.

E beta say if police do you anytin you go report am nor be to do am by yoursef, this na wetin the PRO tok.

CSP

bound

We Tie Am Cus Hin Na Winch – Stepmother

 

The police wey dey for Ekeki Division for Bayelsa State don arrest one Peremoboere Botu, wey be stepmother to one 9 years, Godday Simon Aprebo as she tie the boy like stock fish for pole say the boy na winch.

The stepmother say the boy use winch take dey cause many bad tin for dem family and wan even try kill hin papa.

The tin happen for Agboli Street wey dey for Okutukutu side inside Yenagoa Local Govimet for the state and na with the epp of police dem fit take save the boy.

Na some advocacy groups, Starrz Safety Initiative wey Executive Director, Mary Bekeowei Accrah and FOMWAN wey Hajia Maryam Abeki, quickly call Bayelsa State Gender Response Initiative Team (GRIT) make dem come to the boy mata.

According to the neighbours, the boy stepmother and real papa chained am so that he nor go run cus dem say hin na winch.

The mata say nor be small punishment nai dem give the boy say hin must confess say hin be winch.

Daily Trust say the papa of the boy na Simon Afrebo and hin na prophet but don run.

The State Chairman for Gender Response Initiative Team (GRIT), Barr. Dise Ogbise, say the tin really happen and dem must punish those wey their hand dey inside.

While the police tokpesin for Bayelsa State, SP Asinim Butswat, say dem dey investigate the case small small.