News dey play say the Nigerian police shoot one civilian wen no carry any arms die. One video dey play for Twitter and Facebook wen show how two armed police officers take dey drag one unarmed young man through the street, before dem come fire am for close range. But for now, we neva know the nature of the victim crime and him identity plus including d officers wen run d matter. The police come tweet yesterday say the acting Inspector General of Police, Mohammed Adamu, don order full investigation into the incident.”

Walter Onnoghen don file one suit against the federal government concerning him suspension as the chief justice of Nigeria (CJN). Na Onnoghen lawyers wen be Wole Olanipekun, Adegboyega Awomolo, Kanu Agabi and James Onoja — nia file d suit. President Muhammadu Buhari suspend Onnoghen wen dey face charges of false assets declaration and like dis, he dey currently dey stand trial for the Code of Conduct Tribunal (CCT).

One truck wen dey loaded with 33,000 litres of fuel catch for d Ojo area of Lagos State today and like dis wen neva know d number of people wen don kpuff for d matter, although plenty motor burn for d fire. The truck wen dey carry d products dey go one petrol station for along the Mile 2 / Badagry expressway, fall as e reach Barracks bus-top becos of bad road. Meanwhile people wen dey long side for d area say dis one no be the first time wen trucks dey fall for the bad spot becos dis kind tin happen too about three weeks back wen come make passengers dey stranded for hours.

Plenty protesters ball enter the Lagos State House of Assembly today and na so dem come dey warn the lawmakers say make dem sharp sharp bone any plan wen dem get to impeach the State Governor, Akinwunmi Ambode. The protest dey come up barely two days after the lawmakers threaten to impeach Ambode if he fail to explain reason why he use some kind money anyhow. Meanwhile more than 36 lawmakers dey talk say the Governor action violate the 1999 constitution.

The Federal Government don start to dey refund d more than N1.3 trillion wen dem dey owe the Niger Delta Development Commission NDDC since wen dem enter office. Na Prof. Nelson Brambaifa wen be Acting Managing Director of the commission nia drop dis informate thru the commission Director of Corporate Affairs, Mr. Ibitoye Abosede, yesterday for Port Harcourt. Brambaifa wen yarn during him inaugural meeting of the new management of the commission come talk say President Muhammadu Buhari love the Niger Delta region piecesly.

The Indigenous People of Biafra (IPOB) say dem go conduct one referendum to know whether dem go join sovereign state of Biafra or not on February 16. Na Emma Powerful wen be talk talk person for IPOB nia make d announcement for one statement for Anambra state. Meanwhile, the presidential and national assembly elections dey scheduled to hold on that same date.