Delta State Government before before Seceto and odon for the All Progressives Congress for Isoko Nation, Comrade Chief Ovuzorie Marcurley don talk say as a Delta Central Senator and Deputy President of the 9th Assembly, Senator Ovie Omo-Agege don make ogbonge impact not be only say he attract one Federal Polytechnic Orogun for Delta Central, Federal Medical and Health Sciences Kwale for Delta North but say he still give the Isoko Nation one Senator wen dey represent Delta South Senatorial District presently. Comrade Chief Ovuzorie Marcurley yarn dis one for Owhelogbo for Isoko North Local Government Area of Delta State during Senator Ovie Omo-Agege interactive Stakeholders leaders meeting for Isoko Nation. Senator Ovie Omo-Agege come thank the Isoko Nation for d way wen dem take gather come out give the All Progressives Congress more than 25,000 votes during the 2023 general election and na so he come still tell the Isokos to ask the Governor of the State Rt. Hon. Sheriff Oborevwori questions about the big big osusu wen dey enter the state, say becos he no dey do one better thing for d state.
We go refund some marketers monie – Dangote Refinery
Dangote Petroleum Refinery don announced plans to refund oil marketers wen buy petrol for rates wen high pass the advertised prices from any of their key partners. For one statement over the weekend, the refinery say their partners include AP (Ardova Plc), Heyden, and MRS Oil for across Nigeria. On February 26, the refinery announce cut for their ex depot price of petrol, to N825. Dangote refinery come talk say dem go bear d N16 billion loss by refunding N65 per litre to marketers, to make sure say Nigerians benefit from cheaper petrol.
Tori of terrorist for Abuja na lie – NPF
The Nigeria Police Force (NPF) don talk say d report wen dey go round for social media say 79 terrorists dey hide for Lugbe and other areas of Abuja, Naija capital no be true. For inside one statement on Sunday, Muyiwa Adejobi, the force otota talk say the message wen dey circulate for social media, including WhatsApp and other platforms wen make announcement of curfew for the Lugbe area of Abuja, na fabu and say piakan truth no dey for the matter.” The force otota say intelligence wen the police and other security agencies gather show say terrorists no dey long side for the area.
I Nor Dey Plan Wedding With Kate Henshaw – Pastor Ighodalo
Senior Pastor of Trinity House, Pastor Ituah Ighodalo wey marry foma beauty queen Ibidunni Ighodalo wey don die, say he nor dey plan any wedding with actress Kate Henshaw. Aproko start to dey waka for social media say di pastor dey plan marriage with Nollywood actress and pipo don even dey buy Aso-Ebi. But for interview wey di pastorman do for Upgrade TV nai be say na big lie as he nor dey plan any marriage. He say he love him late wife wey dem two adopt children togeda. dat since di wife die since 2020 her spirit still dey with am. According to di pastor, “I love my wife well well. I just dey see everyday as e be. I nor know wetin dey front. For di Aso-Ebi, me I nor know. know say social media pipo get di way dem dey behave.” Laslas, nai he say di pipo wey dey spread di news go dey make moni from am and wen dem don gada finish, make dem come he church come pay tithe.
Seating Position: Natasha No Do Well, Senator Ireti Kingibe
Senator Ireti Kingibe, wey dey represent FCT pipo for Abuja don say wetin Senator Natasha Akpoti-Uduaghan do dey cus trouble for where to sitdon for di National Assembly no suppose be like dat. Everybodi shock di way dem see Senator Natasha stand face to face with Senate President, Godswill Akpabio, dey shout for am say she nor go ever change her seat. Afta di many tok and Natasha come show for Arise TV morning program on Friday, say di resin way nakd Senators Akpabio change her seat na cus he nor dey like make she tok for di House and he do bin beg her to friend am two times but she nor gree. Natasha don tok komot nai Senator Kingibe of FCT say she blame Natasha as she nor suppose do like that cus dem change other pipo seat too so she for use sense handle di mata as all of dem know say di House nor dey favour women. She say dem know say Senate nor dey behave well to women, di oda teree woman senators nor wan tok anytin as dem nor want any bad energy from Natasha.
I Don Come Start My Work Back, Obasa For Lagos State House of Assembly
Lagos State House of Assembly dey get many kwanta wey dey make di House shake cus of leadership position but on Thursday tins come turn anoda tin as di foma Speaker, Mudashiru Obasa come with plenty security to take over seat from Mojisola Meranda on Thursday. Na for January 13 nai di House take porchu Obasa say make he nor be Speaker again cus he dey misbehave and dem come put Mojisola Meranda wey be di Deputy. But bifor dem know wetin dey hapun tori start to waka say President Bola Tinubu nor happy say dem remove Obasa put Meranda. As tok dey go front and back on Thursday nai dem withdraw Meranda security details and give Obasa back he own security details. Di foma speaker force hinsef enta di complex dis morning with policemen and different security pipo, push di speaker office door open say he don come start work and naso he supporters dey him back.
EFCC carry Jude Okoye go court
The Economic and Financial Crimes Commission (EFCC) don carry Jude Okoye, the elder brother and former manager of the music group Psquare wen no dey function again go court, on charges of laundering N1.38 billion, $1 million, and £34,537.59. Okoye mark present for court alongside him company Northside Music Ltd on Wednesday before Alexander Owoeye of the federal high court for Lagos on top seven-count charge. Okoye plead “not guilty” to the charges. Inibehe Effiong, him lawyer clear the court about one pending bail application and den he come make request make dem keep the defendant for the EFCC custody pending the hearing. However, Larry Peters Aso, the prosecution lawyer, object the request, say the EFCC custody don full. Aso come still tell the court to keep the defendant for the correctional facility since he don take him plea.
International fraud groups don dey get leg for Naija – EFCC
Chairman of the Economic and Financial Crimes Commission EFCC, Ola Olukoyede, don raise concerns say organised foreign fraud groups dey establish criminal cells for Nigerian cities and say dem dey recruit young Nigerians into cybercrime, even cryptocurrency fraud. One statement wen the EFCC Head of Media and Publicity, Dele Oyewale drop on Wednesday show say Olukoyede make dis comment wen he dey receive participants of the Executive Intelligence Management Course from the National Institute for Security Studies, wen their Director of Studies, Hyginus Ngele lead. He come talk say recent EFCC intelligence suggest say foreign fraudsters dey still dey illegally dey import arms into Nigeria with cryptocurrency as a means of payment.
Navy close four illegal refinery for Warri South
The Nigerian Navy Forward Operating Base Escravos on Wednesday don close four illegal refinery for Obodo for Omadinho community inside Warri South West Local Government Area of Delta State. When the Commanding Officer of FOB Escravos, Navy Captain Ikenna Okoloagu dey yarn concerning the operation, he come talk say them fire down with the crackdown based on d intelligence report wen dem receive. He come warn those wen dey do oil theft and dey scatter the economy make dem stop becos the base full ground remain to stop them and see say dem face the music of the law.
Dem dey threaten us! protect us as we dey do our work – Prof. Adeyeye
The Director-General of the National Agency for Food, Drugs Administration and Control (NAFDAC), Prof. Mojisola Adeyeye, don raise the alarm say people dey threaten her life and the safety of agency staff, den she come call on authorities to protect them as dem dey carry out their duties. Wen Prof. Adeyeye dey yarn for one State House briefing for the Presidential Villa, Abuja, on Wednesday, she come talk say NAFDAC recently seize illicit drugs wen worth more than N1 trillion for one ongoing crackdown against substandard and fake pharmaceutical products. She come talk say the agency tight enforcement efforts don lead to the seizure of 87 truckloads of banned, expired, and substandard medical products. Among the items wen dem seize na USAID- and UNFPA-donated antiretroviral drugs, male and female condoms, and other compromised medical supplies.