….Olu of Warri don kpeff
….new Olu, e no go work-Ayiri
The Itsekiri National Assembly don officially announce say His Magesty Ogiame Ikenwoli, the Olu of Warri don kpeff den dem come introduce the person wen go take over from d late king, Prince TSOLA EMIKO give the Itsekiri Nation.
Them announce the new Omo Oba yesterday for Ode – Itsekiri wen dey for Warri South Local Government Area of Delta State.
Chief Johnson Atserunleghe, the lyatsere of Warri Kingdom when formally announce say His Magesty, Ogiame Ikenwoli don denkwes give the Solemn Assembly of the Itsekiri Nation come still announce one mourning period of three lunar months throughout the ltsekiri Nation.
Meanwhile,the Ologbotsere of Warri, Chief Ayiri Emami, don talk say dis new Olu of Warri wen dem introduce so no go work, say the announcement of Prince Tsola Emiko as Omoba dey illegal.
Even as Ayiri dey tell d Itsekiri people and concerned Nigerians say make dem dey calm, he come talk say d Olu stool wen dem dey respect well well no be for the highest bidder.
He come talk say out of the seven kingmakers for the kingdom, na only two of the kingmakers nia mark present for the ceremony wen shele for Ode-Itsekiri, the ancestral home of the Itsekiri people for Delta State.