E clear say fees for Abuja-based private schools go increase after the Minister of Federal Capital Territory, Nyesom Wike decide to increase operation charges of private schools for the capital city.
Under the new tax regime, each school go come dey pay according to the fees wen students dey pay and the number of enrolments and all applications now na N40,000.
One memo wen the Head of Account, Department of Quality Assurance of the Education Secretariat, Mudi Muhammed drop wen news people carry on Monday, say the development go start from January 2024.
Meanwhile, the National Association of Private School Owners NAPPS for the FCT, for one letter wen dem write give the Education Secretariat, say dis kind tax review at a time when the Federal Government don promise to end many taxes go only increase the cost of education wen many parents no go fit cope with and dis one go come make the population of out-of-school children increase.
For the letter wen their Chairperson, Ruqayah Agboola sign, NAPPS come still talk say the tax review go put more pressure on private schools for the FCT as e go increase their running costs.
The association come talk say their members reject the proposal kpata kpata say the hard economy, the huge bank loans wen dey outstanding for their books, the fees wen many parents dey owe, the many levies wen dem dey pay give local government and other agencies, and more importantly payment of their teachers’ salaries, other staff as well as maintenance of their infrastructure no go make dem fit cope.
The members come beg the minister to use him good office take effect 50 per cent reduction for the existing annual dues so that their office go fit recover the outstanding dues and say dem go partner with the minister to achieve this one.
