Prof. Mojisola Adeyeye, the Director-General of the National Agency for Food and Drug Administration and Control (NAFDAC) don talk sa the Astrazeneca vaccine wen dem recently inaugurate wen dem don share go states to take treat COVID-19 no get side effect. Adeyeye, when yarn dis one on Thursday for Abuja, just after she don collect her own vaccination come talk say NAFDAC go through the application dossier of the vaccine before dem approve am to take treat Nigerians. Adeyeye say d positive side of AstraZeneca vaccine plenty pass the negative part becos dem don already soji am well. She come talk say e no get any medicine wen no get side effect, especially when d medicine still dey go through the developmental stage.
Kidnappers gbab students for federal college Kaduna
Some guys wen carry fash don kidnap some female students for the Federal College of Forestry Mechanisation wen dey for the Mando Igabi Local Government Area of Kaduna State. According to reports, d matter wen play dis early mor mor affect most of d female students becos dem no touch the male students. The Kaduna State Commissioner for Internal Security and Home Affairs, Mr. Samuel Aruwan wen confirm d gist come talk say dem don already start investigation for d matter.
PPRA make U-turn for fuel price mata
With the news of increment for the price of petrol, the Petroleum Products Pricing Regulatory Agency PPPRA don delete one informate wen dem first publish say the new price of petrol don reach N212.6 per litre. The agency delete d informate hours after dem publish the template for their website, and after the Nigerian National Petroleum Corporation NNPC talk say nothing like increment for the ex-depot price of petrol. For one tweet wen NNPC drop thru their verified Twitter handle, @NNPCgroup today, dem say nothing like increment for d Ex-Depot Price of PMS for dis month of March.”
EFCC carry Muhammed Wakil go court
The Economic and Financial Crimes Commission (EFCC) carry one before before Minister of State for Power, Muhammed Wakil go court on Monday on top two counts of corruption for the the High Court of the Federal Capital Territory, Apo, Abuja. The prosecution say for d year 2014, the defendant corruptly receive the sum of N148 million from the osusu wen dem approve for the payment of outstanding insurance premiums and money wen belong to people wen don denkwes and staff members of Power Holding Company of Nigeria (PHCN) wen dey sick. According to reports, he receive d dough from Bestworth Insurance Brokers Limited through the Polaris Bank account of him company, Corozzeria Nigeria Limited.
Law permit me to stay office till 2024-IGP
The Inspector-General of Police, Mohammed Adamu don tell the Federal High Court for Abuja say the law permit am to remain in office till either 2023 or 2024. Adamu yarn dis one for him court documents wen he file to counter one suit wen dey challenge the three-month extension wen President Muhammadu Buhari give am for d month of February. Mr. Adamu reach the maximum 35 years for service on February 1, but president Muhammadu Buhari come give am get three-month extension on February 3.
Wiagam to Buhari: Sit up
One odon for the All Progressives Grand Alliance (APGA), Kashim Wiagam don tell president Buhari to sit up and den tackle the issue of insecurity wen dey play for d country. Wen Waigam dey yarn for one recent interview, he come tell oga presido say make he no take partia for d matter. He come still advise the service chiefs wen dem newly confirm say make dem no take sides so dat dem no go dey distracted from their mandate of securing the country.
Some leaders no happy say I intervene for the food blockade mata-Yahaya Bello
Yahaya Bello, d governor of Kogi state don talk say some leaders wen dey “close to the seat of power” no dey happy say he intervene for the blockade of food supply to the south. The move wen the Amalgamated Union of Foodstuffs and Cattle Dealers of Nigeria (AUFCDN) make come make d prices of food items for the south high and na dimmso e still make d items scarce. But for one meeting on Thursday, d matter na say oga Bello help for d agreement process to end the blockade by northern traders.
Premier League: Manchester United beat Manchester City for Etihad Stadium
Manchester United kpokpo City rivals Manchester City 2 kondo on Sunday for d English Premier League game wen shele for the Etihad Stadium. United open scoring for the second minute of the game after Gabriel Jesus bring Anthony Martial down for the box barely one minute as d game start. Na Bruno Fernandes nia come score d penalty before Luke Shaw come add the second to seal all 3-points.
No be Aso ock the fire take happen- Garba Shehu
The Presidency don talk say dis past weekend, fire outbreak happen for outside the perimeter of Aso Rock, wen be Naija seat of power. According to Garba Shehu, presidential otota, the matter play between the villa and the army barracks “towards Asokoro”. He come talk say d report wen dey play say na for inside Aso rock gan gan nia d the fire outbreak for take happen no be true. Wen Shehu come dey voice for one statement on Sunday, he come talk say na bush fire, but say dem don start investigation on top d matter.
Vigilante group don arrest Fulani badoo, Iskilu Wakili
Local Ibarapa security operatives, including Oodua Peoples Congress Vigilante and other groups don arrest the baddest Fulani gbolons wen dey worry Oyo communities, Iskilu Wakili. According to reports, na on Sunday nia dem take arrest Wakili after different attempts wen come result to d exchange of bullets. Based on d reports wen reach us, Wakili and him gang don kpuff and kidnap different people for Ibarapa, Oke Ogun, Oyo State.