The Niger Delta Development Commission (NDDC) don talk say dem give each of the governors of the nine oil-producing states N100million each as COVID-19 palliatives. Na chairmo of d Senate Committee on Ethics Privileges and Public Petitions, Senator Patrick Ayo Akinyelure nia clear news people for Abuja say na NDDC officials nia make d claim. He come talk say the Senate go fit summon the governors to give account of how dem waka pass wit d money.
House of Representatives: Bill to summon Presido don pass second reading
One bill wen dey seek to give the national assembly power to summon the president don pass thru second reading for the House of Representatives. The constitutional amendment bill wen Sergius Ogun from Edo state sponsor dey seek to make the president fit dey appear before the lawmakers and den dey answer questions on top issues wen involve national security and related matters. E go still give state houses of assembly d power to summon governors under the same circumstances. Although dem no really state the penalty wen dey involved if any of dem disobey such summon, Ogun clear news people say, the offence fit attract impeachment.
Bureau of Statistics: Inflation rate don increase
The National Bureau of Statistics (NBS) don talk say the inflation rate rise from 16.46 per cent for d month of January go 17.33 per cent for February 2021. The consumer price index (CPI), when dey measure inflation increase by 17.33 per cent (year-on-year) for February 2021.” The NBS come talk say dis one dey 0.86 per cent points higher than the rate wen dem record for January 2021 wen be 16.47 percent.
Donny van de Beek ready to comot Manchester United
Reports say Donny van de Beek don ready to leave Manchester United after just one season becos he no dey get game time since he rotate comot from Ajax for £40million. Na the midfielder nia the Red Devils’ spend d biggest money take buy last summer but he neva fit get regular place for the first-team with just two Premier League games wen he start. According to reports, the Dutchman wen don dey frustrated go soon yarn with executive vice-chairmo Ed Woodward before the end of the season but say he wan rotate comot from Old Trafford so dat him career go wake up.
We don vaccinate 8000 people-PTF
The presidential task force (PTF) on COVID-19 say na 8,000 people nia dem don vaccinate for across 35 states, including the federal capital territory (FCT). Wen Faisal Shuaib, executive seceto of the National Primary Health Care Development Agency (NPHCDA), dey voice on Monday during one media briefing, he come talk say na only Kogi state nia neva receive the vaccine because their cold chain facility wen dem go take preserve the doses dey under repair. Shuaib come still talk say fear no dey as per the AstraZeneca vaccine, undermining say some European countries don suspend d use of d vaccine.
Naija carry 3rd position for countries wen get highest unemployment
Naija wen be Africa largest economy don carry third for the list of countries wen get the highest unemployment rate for the whole world. The country unemployment rate hit new record high of 33.3 per cent for d fourth quarter (Q4) of 2020 from 27.1 wen dem record for d second quarter (Q2) of 2020. According to the Q4 unemployment report wen the Nigerian Bureau of Statistics (NBS) release on Monday, a total of 23.18 million people for Naija either do nothing or work for less than 20 hours a week, and na dis one nia come make them dey unemployed during the fourth quarter (Q4) of 2020.
At Least One Person Die As Pipeline Burst For Warri North
Na at least one person nia don kpeff after crude oil pour from one pipeline wen break wen reports say the Nigeria Petroleum Development Company (NPDC)/ELCREST Joint Venture dey operate. The matter according to reports wen play on Sunday finish Polobubo and Tsekelewu communities for Warri North Local Government Areas of Delta State and na so e still wunjor some indigenes of the communities wen dey for hospital presently. Presido of Polobubo and Tsekelewu communities, Mr. Paul Toruwei wen confirm the gist give news people come talk say d pipeline wen cause d wahala so na major pipeline wen dey carry crude oil from Opuama flow station for Oil Mining Lease (OML40).
DELTA STATE: Bad guys kidnap catholic priest
Reports wen dey reach us na say some guys wen carry fash kidnap the priest wen dey in charge of St. John’s Catholic Church for Ukwuani Local Government Area of Delta State on Monday. The bad guys kidnap the priest wen dem dey call Rev. Fr. Harrison at about 8p.m. as he try dey dodge one bad spot for Oria-Abraka. Some people wen dey around wen d matter take play come talk say the kidnappers ratata anyhow for air to pursue people and make people for no counter dem.
We don finish arrangements for sales of JAMB forms
The Joint Admissions and Matriculations Board (JAMB) say dem don finish all arrangements to start the sale of 2021/2022 Unified Tertiary Matriculation Examination (UTME) and Direct Entry (DE) registration forms. The board drop dis aproko for their Weekly Bulletin wen dem tender give the News Agency of Nigeria (NAN) on Monday for Abuja. The board say dem go announce official dates wen dem go take start to hail both documents and wen the exams go take start not later than March 24. According to JAMB, delay dey for the 2021 exercise becos of the COVID-19 okamuka we en happen. JAMB come give warning say their hand and their leg no dey for any ongoing sale of forms and registration say, na wayo wrists dey run am.
Delta state: House wife kpuff husband
No be small okamuka nia play on Monday when one house wife kpuff her husband for around Kulup street off Ekrejegbo for Ughelli North Local Government Area of Delta State. According to reports, the guy wen don denkwes so and him wifey been get quanta wen the suspect come use cutlass take knack d husband for back of him head. Based on d report, casala burst out when the guy man wen don legoo so go sleep for outside the previous night con return back to house on Monday. As soon as the suspect realize the crime wen she don commit she come try to escape but men wen no get joy for the area come cramp her, as dem dey wan roast, nia some police officers come rescue her.