….mago mago dey the election- APC ….APC don tain again- Latimore No be small talk dey play concerning last Saturday Local government elections for Delta State as the All Progressives Congress APC dey hold ground say na so so mago mago nia play during the exercise. Wen state publicity Seceto of the APC Sylvester Imonena dey yarn for one statement on Sunday, he come talk say for plenty wards and LGA, dem no see election materials and results sheets wen he claim say d state government and the Delta State Independent Electoral commission DISIEC don already pre-arrange to take cheat the people. Wen Executive Assistant to the Governor of Delta State on Communications Dr Fred Latimore JP dey yarn, he come congratulate all Chairmen and Councillors Elect under the platform of the Peoples Democratic Party, PDP, say the All Progressives Congress, APC, don tian again. For one statement wen Latimore download give news people for him villa for Kokori for Ethiope East Local Government Area, on Sunday, he say the political supremacy of PDP over strong and so d main opposition party wen be APC, no need to dream of making any better impact for future elections, especially d 2023 general elections. He come still talk say na d lack of preparations for LGA elections nia lead to the withdrawal of the APC from the contest half way, out of self pity.
War against Boko Haram: Soldiers tule leave their posts
Military sources say about 100 officers and soldiers of the Nigerian Army don gbes leave their duty posts around Marte for Borno state. For d month of February, the soldiers recapture Marte from the insurgents and dem achieve the victory after Ibrahim Attahiru, the Chief of Army Staff give dem 48-hour ultimatum wit d promise to provide dem wit all the necessary things wen dem need for d gbege. But military sources say the officers and soldiers don tule after dem no get d reinforcement and additional weapons wen dem ask for from the authorities and dem come receive reports again say the insurgents dey plan to launch another attack.
2.3 million Nigerians don register for covid-19 vaccine-NPHCDA
The Minister of Health, Dr Osagie Ehanire don hold meeting with commissioners for health for the 36 states as part of efforts to make sure say dem share and distribute d COVID-19 vaccine well. Wen the Plateau State Commissioner for Health, Dr. Nimkong Lar dey yarn on Wednesday, he come talk say dem go hold meeting today for Abuja. The National Primary Health Care Development Agency (NPHCDA) come talk on Wednesday say na nothing less than 2.3 million Nigerians nia don register for COVID-19 vaccination 24 hours after dem launch one portal for that purpose.
Gateman get hand for the kidnap-Matawalle
Zamfara State Governor, Bello Matawalle don point d gateman of Government Girls Secondary School, Jangebe, where bad guys for take kidnap about 300 students last week, say he get hand for d matter. Matawalle yarn dis one on Wednesday while he mark present for one TV programme. Matawalle come talk say na d children nia implicate the watchman of the school say that after their release, the bandits mention say na the watchman nia give dem d informate wen dem take work.
Serap to Buhari: Investigate all the money wen dey miss
THE Socio-Economic Rights and Accountability Project, SERAP don tell President Muhammadu Buhari to investigate all the alleged missing N11 trillion funds wen dem allocate for the tidying of electricity projects since 1999. Wen SERAP Deputy Director, Oluwadare Kolawole dey yarn for one press conference, he come talk say undermining say President Muhammadu Buhari promise to senior up for the fight against corruption, and dem give us access to regular electricity supply, he say d matter neva work becos of d systematic and widespread corruption for the sector. Kolawole come tell “President Buhari to sharp sharp undertake one thorough and transparent investigation into the power sector privatization, publish the details of ownership of public stakes of 40 per cent for those entities, and to also make sure say people no use government public resources for their private business.”
Nothing wrong to use boat take travel-Amaju Pinnick
Presido of the Nigeria Football Federation, Amaju Pinnick, don talk say nothing dey wrong for the Super Eagles to use boat take travel go Benin Republic for d African Cup of Nations qualifier. Coach Gernot Rohr talk say the team go likely use boat so dat dem go fit dodge the bad roads wen link Naija and the neighboring Benin Republic but e clear say d players no like d idea at all. Meanwhile, Pinnick when yarn on Wednesday for Lagos come talk say he no see anything wrong there, but he come still talk say d NFF neva conclude yet on which means of transporting the players go use. Whereas d AFCON qualifier against Benin Republic go shele on Saturday, March 27 for Port Novo.
NLC don threaten to strike based on minimum wage
Leadership of the Nigeria Labour Congress NLC don threaten to fire down wit nationwide strike becos of d move wen some state dey make say na d states dem go determine d minimum wage. Wen NLC presido Ayuba Waba dey yarn after the National Executive Council meeting, he come talk say dem go gbege any effort to tight workers for d country. He come still tell the government to sharp sharp address d fuel scarcity and the way wen petroleum marketers for the country take dey use our head.
Police don put no movement ban based on election maras
Based on the forthcoming Local Government Council elections wen go take place for Delta State on Saturday, 6th March, 2021, the commissioner of Police, Delta State Command, CP Ari Muhammed Ali, don give order say motor no go move for d state from 12am on Friday 5th March go reach 4pm of on Saturday 6th March 2021. The CP when give this order on Wednesday d 3rd of March 2021, come talk say dem no go stop people wen dey go vote from voting. The Command come assure all essential service providers including NUPENG tanker drivers/workers, PHCN, GSM service providers, Hospitals/Clinics staff, Fire services and media houses and d rest say their safety dey guaranteed even as dem dey carry out their lawful duties during the elections. The command come still talk say na only those wen dey on official and emergency duties with valid means of identification nia dem go allow to move.
Naija don receive covid-19 vaccines
The Federal Government take delivery of the 3.9 million AstraZeneca COVID-19 vaccines wen dem promise to take protect Nigerians from the covid palava. This one nia be the first batch of the 16 million expected vaccines through the World Health Organization’s (WHO’s) wen COVAX facility dey lead. Even as the Executive Director/CEO of the National Primary Health Care Development Agency (NPHCDA) Dr. Faisal Shuaib dey talk say belle dey sweet am on top dis new development for him twitter handle, he come take say the agency don ready to start to dey give doses of the COVID-19 vaccine to frontline health workers.
Zamfara, a no fly zone- Buhari
President Muhammadu Buhari don declare Zamfara as no-fly zone, becos of d way wen bandits take kidnap some schoolgirls of recent for the state. Na Babagana Monguno, d national security adviser (NSA) nia download dis informate give state house correspondents after the national security council meeting wen hold on Tuesday. Oga Presido come still approve ban on mining activities by non-state actors.