Governor Ifeanyi don Commission both the Ubeji road, NPA access way and Ighogbadu Secondary school for Warri South Local Government Area of the state. Wen d governor dey yarn during the commissioning of the school on Tuesday for Okere-Urhobo Kingdom, he come promise say he go invest more into education. He come still hail area for the peace wen dey for the kingdom say dis one go make him administration fit leave solid foundation wen the next administration go build on.
Thiago Alcantara no be Jurgen Klopp-type player – Scholes
Paul Scholes don talk say Liverpool star Thiago Alcantara dey more suited to Manchester United say no be “Jurgen Klopp-type player”. Dem been dey expect much from Thiago when he rotate enter Anfield for £20 million from Bayern Munich for the summer, but so far, he don struggle to live up to expectations for the famous red shirt. Meanwhile, people don suggest say the Spain international don slow Liverpool down but Scholes dey of the opinion say he go fit in better for United for more central role.
We no dey shake-Southern Farmers
Some southern state governments and farmers don talk say nothing dey par as northern food suppliers don stop to dey send foodstuffs to the south, dem say na opportunity for the South to increase their food production capacity. Wen officials of the states wen include Lagos, Cross River, Akwa Ibom, Delta, Enugu and Ondo dey yarn for separate interviews on Monday, dem come talk say dem take dis actions to make sure say food and animal production boku. You go remember say cattle and foodstuff dealers under the Amalgamated Union of Foodstuffs and Cattle Dealers of Nigeria on Thursday stop to dey bring supplies come the South. Meanwhile, dem stop many trucks wen disobey their orders for along the Jebba-Kaduna road last Friday, and dis one come force the military to involve for d matter.
FG don reopen Osubi airport
The federal government don approve the reopening of Osubi airport for Warri for daylight operations. Them close d Osubi airport for February 2020, after quanta wen involve aviation service providers and management of the airport, concerning alleged debt and mismanagement. But wen Hadi Sirika, d minister of aviation dey yarn for one tweet on Monday, he come announce the reopening of the airport, say dem go observe all procedures, including COVID-19 protocol.
Delta State:Taskforce destroy illegal structures
The Delta State Taskforce on Environment don start to dey scatter illegal structures for Warri, Uvwie and around. The demolition happen after d one year quit notice wen dem d state taskforce serve the traders don expire. Wen the state taskforce chairmo Hon. Sylvester Oromoni come dey yarn during d exercise, he come talk say their target na to remove “all illegal structures and all those stores wen people build enter the streets, say dem go carry out the demolition exercise for major cities across the state.” Meanwhile na both d director of Admin Mrs. Amaraebgu Nkechi, state Coordinator, Comrade Kingsley lweka plus the health officers and supervisors of the taskforce nia follow d chairmo waka d waka.
Oil Industry don lose money-Okowa
Governor, Ifeanyi Okowa, on Monday say Naija oil industry don lose better investments becos of d delay for the passage of Petroleum Industry Bill (PIB). Okowa yarn dis one when he receive the Co-Chairmo, National Assembly Joint Committee on Petroleum Industry Bill, Rt. Hon. Mohammed Monguno and members of the committee for d Government House, Asaba. He come talk say dem go increase investments for the nation oil industry as soon as them pass d Bill.
Blanket amnesty go encourage criminals-Ndume
Ali Ndume, d senator wen dey represent Borno south don talk say “blanket amnesty” for bandits go encourage other criminal groups to take up arms. Ndume wen yarn dis one during one interview on Sunday come talk say another form of criminality go fit come up if dem give “blanket amnesty” to bandits, and so new armed groups go dey hope say the government go still negotiate with them. The senator come still call for speedy justice system for the prosecution of suspected bandits, say dis one go helep to discourage other people.
Delta State:Bad guys Kidnap people wen go burial
Dis past weekend, some bad guys wen carry fash kidnap one bus wen carry mourners wen been dey go for burial for Agbarho community for Ugheli North Local Government Area of Delta State. The victims according to reports been dey travel from Port Harcourt, Rivers State dey go for burial when the bad guys take kidnap dem on Saturday. Sources say dem waylay the bus between Evwreni and Ogor communities.
Government dey tackle power mata-Omo Agege
Deputy Senate presido Ovie Omo Agege don talk say the completion and commissioning of the 1.35 KW Solar Hybrid power solution wen the Rural Electrification Agency REA tidy for the Federal University of Petroleum Resources Fupre na part of efforts by the federal government to tackle power situation for Naija through renewable energy. Wen Omo Agege dey yarn dis past weekend during the Commissioning ceremony for the University campus for Effurun, he come talk say with Solar Hybrid solution, the kians go come fit dey do more research and dey carry out their constitutional mandate for the oil and gas sector. Wen the Vice Chancellor of Fupre, Prof Akpofure Rim Ruke come dey yarn, he come hail the Federal government for the Power Solution den he come talk say the kians no go only maintain am but say dem go work to increase the capacity say the school don go far for d area of mitering.
Joe Biden don lift green card ban
US Presido Joe Biden don lift one restriction wen dem been place on the giving of green cards. For d month of April 2020, before before Presido for d US Donald Trump stop the giving of new green cards as move to “protect American jobs”. But wen Biden come dey voice on Wednesday, he come talk say the ban don cause more harm with no good.