Director General of the Nigeria Centre for Disease Control (NCDC), Dr. Chikwe Ihekweazu, don talk say na d plenty social gatherings nia make covid-19 cases dey increase for across the country. Wen Ihekweazu dey yarn during one interview on Monday, he come talk say he no like d fact say Nigerians no dey gree take responsibility for the prevention of the virus. He come talk say until one vaccine don dey readily available, na the non-pharmaceutical measure still remain the best way of dealing with the okamuka.
Senate to confam Adulrasheed Bawa as EFCC Chairmo
President Muhammadu Buhari don tell the senate to confirm Abdulrasheed Bawa as d chairman of the Economic and Financial Crimes Commission (EFCC). Na Femi Adesina, presidential otota nia yarn dis one for one statement today Tuesday. Bawa wen be 40 years old na trained EFCC investigator with better experience for the investigation and prosecution of Advance Fee Fraud cases, official corruption, bank fraud, money laundering, and other economic crimes. Meanwhile, Bawa get B.Sc degree for Economics, and Masters for International Affairs and Diplomacy.
IGP don order police men to represent for Oyo state
The Inspector-General of Police, Mohammed Adamu, don give order for the immediate release of four units of riot policemen to go address the violence wen dey play for parts of Oyo State. The intervention forces still include the Force Intelligence Bureau operatives and surveillance helicopter from the police airwing department. IGP Adamu come sha tell the citizens and people wen dey long side for Oyo State and other parts of d country say make dem embrace peace and den cooperate with the police .
WAEC don release 2020 SSCE results
The West African Examinations Council WAEC don release the 2020 West African Senior School Certificate Examination for private candidates. Even as d council dey announce the release of the results on Monday, them come talk say 39.82 per cent made credits for five subjects, including Mathematics and English. The Head of the National Office, Patrick Areghan, come still announce the opening of registration for the 2021 WASSCE for school candidates.
Suspected herdsmen gbaskele couple wen wan marry
Some guys wen dem dey suspect to be Fulani herdsmen don kidnap one couple when suppose marry on the 13th of February for along the railway for Emuhu, Agbor, for Ika South Local Government Area of Delta State. According to reports, d kidnappers dey demand for N15 million before dem go release d couple. Area don call and even text the Police Public Relations Officer for the state, DSP Onome Onovwakpoyeya plenty times, but she neva reply as at the time wen we take file this report.
Delta state government don give deadline to land owners
Delta state Government don give people wen buy lands from dem for urban areas for more than two years, three months to develop those lands otherwise dem go revoke the Certificate of Occupancy (C of O). Na the Commissioner for Information, Mr Charles Aniagwu nia give the warning on Monday for one news conference for Asaba. Aniagwu come talk say the attitude of some of these people wen get land from the state government wen no gree develop for long periods no work, he come talk say the situation dey affect the transformation of the environment through d urban renewal effort of Governor Ifeanyi Okowa. Aniagwu come talk the state government don decide to use section 5 of the Land Use Act take drive the process.
UPU don inaugurate committee for Okugbe Microfinance Bank
The apex socio-cultural body of the Urhobo ethnic nationality, Urhobo Progress Union (UPU) worldwide, don officially inaugurate one fundraising committee for the establishment of Okugbe Micro Finance Bank (OMFB) wen area don dey wait for since. President-General of UPU, Olorogun Moses Taiga, when inaugurate the committee with, Mr. Abraham Ogbodo as chairmo come talk say the panel go help to raise N300 million wen dem need for their start-up. Once dem don set up the micro finance bank, e go take care of the financial needs of the Ewheya (women) and Ighelle (youngsters) by increasing small and medium scale businesses for Urhoboland.
We no get armed herdsmen for Naija-NIS
The Nigeria Immigration Service NIS talk on Sunday say we no get armed herdsmen for the country. The NIS otota Sunday James, when yarn dis one for one interview wen he get with news people for Abuja, come talk say tight security don dey for d borders since the introduction of the Migration Information and Data Analysis Systems. Wen groups like the Christian Association of Nigeria, the Yoruba socio-political group, Afenifere, the Pan-Niger Delta Forum and Ohanaeze Ndigbo come dey yarn on top d matter, dem come talk say the service no know wetin dem dey talk.
Court sentence ex-sars agent to death
One High Court for Benin don sentence one constable, Joseph Omotosho when dem dismiss wen be dey attached to the Special Anti-robbery Squad, Edo State Police Command wen no dey function again to death by hanging. Omotosho and four other dey face accusation of conspiracy for the extrajudicial killing of one car dealer, Benson Obodeh for d year 2015 and dem find dem guilty on eight counts bordering on conspiracy to steal and murder. He come still withdraw N330,000 from the dead guy account through ATM, after dem get the PIN number from am before he kpuff am.
We go deal with people wen dey cause kataka-Buhari
President Muhammadu Buhari don warn Nigerians say make dem stop to dey cause violence through ethnic hatred, say him government go take their time deal wit anybody wen carry out dis kind act. For one statement wen Garba Shehu, presidential otota drop on Sunday, Buhari say him administration dey to make sure say all Nigerians dey safe no matter their religion or tribe. This one so dey happen after casala burst among people wen dey long side for Shasha community for Oyo last week, becos of one argument wen play between one Yoruba man and one Hausa man.