The Elders in council of Odidi Federated Community for Warri south west LGA don inaugurate one new executive council wen chief sunny Arigbogha go lead to pilot the affairs of the community effective immediately. The new Exco still get Daniel Deribi as vice chairmo and Bane Mamamu as seceto. Presido of the Elders in Council S.Y Mamamu for one release on Thursday come tell the new leadership to carry development enter Odidi, say dem no go accept their failure to meet d needs and aspiration of the people. He come still tell the public and corporate organizations to work with the new leadership say anybody wen dey deal with people outside the new Exco dey do so on their own risk.
South-south governors dey ask FG to restructure Naija
Governors and people of the South-South Geopolitical zone don begin ask for restructuring in line with the principle of true federalism in order to guarantee peace, security, and stability of the nation. During one meeting wen the leaders and governors of the region get with d FG for Port Harcourt on Tuesday, dem say the country no dey at peace with itself and say e no dey work as e suppose work, say the people of South-South region need attention. Wen chairmo of the South-South Governors Forum and Governor of Delta State, Senator Ifeanyi Okowa dey talk about the position of the zone during the regional stakeholders meeting with a presidential delegation wen the Chief of Staff to the President, Ambassador Ibrahim Gambari lead for the Government House, Port Harcourt on Tuesday, he come call for the restructuring of the nation and true federalism.
Maina cousin don tell am to come out for im trial
One cousin to before before pension oga, Mr. Abdulrasheed Maina, Mallam Aliyu Maina, don tell d before before chairmo of the pension reform task team to submit himself for the continuation of the trial so that the current national embarrassment wen Senator Ali Ndume dey face no go worse pass so. Like dis, Senator Ali Ndume dey for Kuje prison becos he fail to bring Mr. Maina wen suppose appear for court on Monday. For one interview, Mallam Aliyu Maina, first cousin to Maina, come talk say Senator Ndume don put in so much on behalf of Mr. Maina, and say e dey very painful to see say na him dey pay the price becos he helep him paddy.
FG no dey shake for UK decision to sanction-Lai Mohammed
The Minister of Information and Culture, Lai Mohammed don talk say odidi no dey hold the Federal Government becos of d demand wen United Kingdom lawmakers for dem to face sanction. On Monday, the UK lawmakers debate about d alleged human rights abuses during the #EndSARS protest for Naija den dem come ask for sanctions on government officials and security agents like visa ban, freezing of assets, and stopping the funding and training for the Nigeria Police Force. Wen Mohammed come dey react to the development during one televison chat today, he come warn foreign countries say make dem no dey take decisions based on “fake news”.
Provide evidence of the dead bodies dem-Lai Mohammed tell CNN
The Minister of Information and Culture, Alhaji Lai Mohammed don tell the Cable News Network, CNN, one international cable television channel, to present the evidence of their story wen say soldiers massacre #ENDSARS protesters for Lekki Toll gate, on 20th October 2020. Mohammed come talk say CNN break the basic principles of journalism – fairness, and balance, say d organization dey spread fake news without proper investigation. Wen Mohammed come dey yarn for one programme for d Nigerian Television Authority, he come tell d CNN to provide the evidence of d dead bodies wen dem say d soldiers kpuff.
Naija economy better pass other countries
The Minister of Information and Culture, Lai Mohammed don talk say the Nigerian economy dey do well compared to the economies of South Africa, Russia and other countries wen dey for recession. The minister yarn this one today during one television programme. He come talk say the recession na sure banker becos of the global collapse for oil prices wen the coronavirus okamuka cause.
No money miss under my watch-Fashola
The Minister of Works and Housing, Babatunde Fashola don talk say e no get any money wen miss or wen men tiff under him watch between September and December last year. Fashola deny reports say he supervise the illegal payment of N4.6bn into private accounts when he serve as Minister of Power, Works and Housing. The minister come talk say na d N4.6bn wen dem pay give some directors becos of d challenges wen dey come from the use of government payment platform, the Integrated Personnel Payment and Information System IPPIS nia dey cause all d plenty talk.
Government dey do tinz to treat recession for the country- Zainab Ahmed
The Minister of Finance, Budget and National Planning Mrs. Zainab Ahmed don list some of the things wen d federal government dey do to take remove us comot from the recession wen Naija just enter. Wen Ahmed dey yarn for Abuja for the 28th Nigerian Economic Summit Group (NESG), she come talk say some of the measures include stimulating the economy by ensuring cash liquidity; retaining and creating jobs by supporting agriculture and direct labour sectors. Other measures include, investments for roads, rails, bridges, solar power, and communications technologies; promoting local production for all levels as well as advocating the use of Made in Nigeria goods and services, as way of creating job opportunities.
FG go comot tax for people wen dey receive minimum wage
Minimum wage earners names for the country go soon comot from Personal Income Tax payment. President Muhammadu Buhari when make dis announcement on Monday, say the plan na one of the proposals for the 2020 Finance Bill wen dey for the National Assembly. Wen oga Buhari come dey yarn for the opening of the 26th Nigerian Economic Summit Group conference, he come talk say the measure go help to balance the economy
Delta and Anambra communities don begin complain for Niger bridge
Delta and Anambra communities don begin complain seriously about the negative effect wen the construction of the 2nd Niger Bridge dey get on the two communities. For one town hall meeting wen Governor Willie Obiano of Anambra State, seceto to the Delta State government Mr. Chiedu Ebie, Minister of Works and Housing, Mr. Babatunde Fashola, the traditional leaders and youths of the communities wen d matter affect attend, dem say the construction work don cause serious flooding and na so e destroy houses and farmlands. Even as dem dey say the 2nd Niger Bridge don block the communities from getting access to the old Niger Bridge, them come still say make d government construct access roads from both bridges to the two communities