Austin Luciano Reynold wen be one South African police constable wen dem find guilty for the murder of Ebuka Okoli, one Nigerian don dey sentenced to 30 years in prison. Twenty-four-year-old Reynold been dey face accusation say he kpuff Okoli wen be from Anambra state for Durban, one coastal city for Kwa Zulu-Natal province for South Africa for d year 2018. The officer shoot Okoli for close range den he come sakpa am during one raid wen he carry out for the community where Okoli for dey long side, and dis raid so no dey authorized.

Electric shock some prisoners wen dey for d Ikoyi Prison die yesterday. For now no result on the number of prisoners wen d matter affect but reports dey play say while five of d prisoners denkwes, 10 come get injuries. Meanwhile, d minister on top interior, Rauf Aregbesola, don give order for torchlighting on top d matter.

The federal government don give reasons why them neva pay monthly money give N-Power beneficiaries for the past two months. Na the office of the Vice Presido Prof. Yemi Osinbajo nia been dey supervise d program but now d presidency don transfer am go d Ministry of Humanitarian Affairs, Disaster Management and Social Development wen dem newly create. For one press briefing on Monday, the minister wen dey in charge of the new ministry, Sadiya Farouq, say delay dey for the payment becos of the current handing over process of the N-Power to her ministry.

Rivers State Governor, Nyesom Wike don give warning say the security architecture of the country go suffer if politicians influence military operations. Wike yarn dis one when the new General Officer Commanding, 6 Division of the Nigerian Army, Port Harcourt, Gen. Felix Agugo, visit am for the Government House, yesterday. He come tell senior military personnel say make dem no allow politicians use them.

The Defence Headquarters don talk say d news wen dey play say dem dey recruit before before Boko Haram fighters wen don change dey enter the Nigerian military no be true. Na d acting Director of Defence Information, Onyema Nwachukwu nia download dis informate for one statement yesterday for Abuja. Mr. Nwachukwu come talk say the news wen dey play for social media no be true, say na way to take mislead people, he come tell Nigerians say make dem lock up d gist.

One Report don suggest say before before Minister of Petroleum Resources, Mrs. Diezani Alison-Madueke, don fit dey dodge prosecution even though say she dey for London for more than four years because she get Dominican republic diplomatic passport. According to the report wen one Quarter based network, aljazira drop, towards the end of before before Presido Goodluck Jonathan administration, Prime Minister Roosevelt Skerrit of the Commonwealth of Dominica appoint Mrs. Diezani as Commissioner for Trade and Investment and na so she come give am diplomatic passport. The network come talk say d before before minister go fit don buy property wen worth $2.2m near the United Nations for upscale Manhattan, New York, for the Dominican Prime Minister in order to get the passport.

Before before Presido Goodluck Jonathan don talk say d way wen politicians take dey kill for the sake of power no make sense at all. Wen d before before presido dey yarn for Edo state dis past weekend, he come talk say d level of desperation among politicians don dey turn something else. According to am, African politicians don dey use style style take dey replace military coups with civilian coups based on d way wen dem dey behave now.

The All Progressives Congress (APC) don talk say third term plan no dey anywhere for President Muhammadu Buhari. The party come talk say dem no get anything to do wit the recent legal action wen Charles Enya, one of their members take Ebonyi State file wen dey seek third term for the president and governors. The party come still talk say Mr. Enya action dey mostly sponsored by “the desperate and misguided opposition” with the aim of testing the decision wen President Buhari-led administration don already make on this alleged third term agenda.

President Muhammadu Buhari don talk say although say Naija dey rich for petroleum resources, he say d money wen dem dey make from oil no dey enough to take care of the country needs. According to Femi Adesina, presidential spokesman, na yesterday nia oga Buhari for take yarn dis one when he receive Carlos Trejo Sosa, d outgoing Cuban ambassador to Naja for the presidential villa for Abuja. Mr. Buhari come still talk say he dey hope say the relationship between the two countries go continue to grow strong and say body dey always dey sweet am to collabo with Cuba.

Festus Keyamo wen be the minister of state for labour and employment don talk say dem go fit convert Naija large population to asset if Nigerians dey enrolled for skills acquisition programs. Na for one recent television interview nia Keyamo for take download dis informate. He come talk say population wen dey skilled go help to bring about economic development.