Delta State Government go soon start to dey close all illegal private schools for the state. Na the Commissioner for Basic and Secondary Education, Chief Patrick Ukah, nia yarn dis one for Asaba when members of Private Schools Owners of Nigeria (APSON) go visit am. He come talk say the Inspectorate Department of the ministry go soon start to dey close private schools wen neva complete their registration processes wen go qualify them to operate. Chief Ukah come talk say dem go close all private schools wen get provisional approvals to operate wen no still meet up wit the registration requirements two years after dem get the provisional approvals.
CAC go remove 40,000 companies without activity
The Corporate Affairs Commission (CAC) don talk say dem don remove 40,000 registered companies wen neva record any activity. Na Azuka Azinge, wen be CAC acting registrar-general, nia yarn dis one for Abuja wen he dey raport wit news people concerning the activities of the commission between October 2017 and October 2019. Azinge come talk say na 244,428 business names nia dem don register since October 2017 and say the commission don implement the business incentive strategy (BIS) wen dem use take dey reduce the cost of registration of business by 50% in order to reduce the burden for micro, small and medium enterprises.
State government don send relief materials to flood victims
Delta State Government don donate relief materials give victims of the recent flood wen finish some communities for Warri South Local Government Area. The items include bags of rice, beans, garri, sugar, beverages amongst other items, and na so dem hand dem over to representatives from Atse-Olu, Ekurede-Itsekiri, Okere, Okere-Urhobo, Edjeba, Ode-Itsekiri, Omadino and Obodo Communities. Chairmo of Warri South Local Government Area, Dr. Michael Tidi, come tell the community leaders say make dem make sure say dem distribute the relief materials well give the flood victims, den he come still warn them say make dem no hail the items.
Corruption naim make Naija get high rate of poverty
Vice-Presido Prof. Yemi Osinbajo don talk say Naija record high rate of poverty undermining say oil revenues increase becos of corruption. Na wen Osinbajo dey yarn wen dem dey open d FLAG’IT mobile application, one anti-corruption tool wen the Akin Fadeyi Foundation launch for Abuja nia he for take talk dis one. Osinbajo wen Fatima Waziri-Azi, special adviser on rule of law for the office of the vice-president represent come talk say corruption still make d country debt double even when the oil revenue na d highest.
Youths cramp two people, burn them to death for rape
No be small okamuka nia happen for Mosogar wen dey for Ethiope West Local Government Area of Delta State yesterday when one group of guys set fire put for two men body body becos dem try to rape one 13-year-old schoolgirl. Youths cramp the two victims, wen be don first rob the girl popsi for the area before dem come burn dem alive. Some people for the area say d guys wen don die so been dey try to rape d girl when her pops man come shout and na dis one nia come attract youths for the area. Meanwhile na for around the popular Sublane Junction of the community nia d okpetu for take happen.
Naija fit scrap senate because na one single legislature naim we need
Kayode Fayemi wen be the governor of Ekiti state, say Naija go fit scrap the senate becos according to am, all wetin the country really need na one single legislature. Wen d governor dey yarn for d 25th edition of the Nigerian Economic Summit Group conference wen dem just conclude, he come talk say Naija need to look into the size of government. The matter na say Naija national assembly dey made up one senate with 109 members and d house of representatives wen dey made of 360 members.
Many lecturers for UNILAG get comfortable beds for their office
Some students for the University of Lagos (UNILAG) don talk say many lecturers get comfortable beds for their offices. Wen d students dey yarn concerning the sex for grades matter wen dey play for the kians, dem come talk say sexual harassment no be news for the campus. The students wen no gree mention their names come talk say many senior lecturers no dey gree teach because situations dey when more than one lecturer dey take one particular course. Dem come still accuse some of the lecturers say dem dey use the time wen dem suppose use for research and community service take dey meet with female students dey gbalor.
FG need to increase allocation for health sector to 15 percent
The House of Representatives don tell the Federal Government to raise the percentage of allocation wen dem give the health sector for Naija annual budget from 5 per cent go 15 per cent. The lower chamber of the National Assembly yarn dis one for their meeting yesterday when the lawmakers together adopt one motion on the issue. According to the House, the amount wen d federal government budget for health care for the country no work at all at all becos e too small.
Statistics from World Bank nor dey paint the whole story
President Muhammadu Buhari don talk say most statistics wen d World Bank and the International Monetary Fund, IMF dey give about Nigeria no dey bear d real facts on ground. Na after President Buhari inaugurate the Presidential Economic Advisory Council, PEAC nia he for take talk dis one. He come tell members of the PEAC say make dem no firedown wit policies wen dem no get knowledge of and say dem dey free to cooperate and consult people wen get better idea wen go fit add value to their assignment.
Alex Iwobi na the danger man wey we dey fear
Brazil assistant coachee Cleber Xavier don talk say na Everton striker Alex Iwobi nia be the man wey dem go watch out for when him team go get am hot wit Naija for d international rob body game wen dem go play for the National Stadium for Kallang, Singapore on Sunday. The two sides go meet for the second time, after dem first play against each other for d year 2003 and den Brazil mama Naija 3 kondo for Abuja. Naija ball enter Singapore with strikers wen dey for better form and dem include Emmanuel Bonaventure Dennis wey dey play for Club Brugge and Lille player wey him name na Victor Osimhen but Brazil assistant coachee Xavier don pick Iwobi as Naija danger man.