Niger Delta based activist Sheriff Mulade don blast d Chief Justice of Nigeria Justice Walter Onoghen wen dey on suspension for d way wen he no take resign him position undermining say he agree to some of the charges wen dey against am. Wen Mulade dey yarn yesterday for Waffi, he come talk say Onoghen for save the nation the current embarrassment if like say he jejely step down. The activist wen no dey carry last come still blast the National Judicial Council NJC for d way wen dem no take take action since wen the issue come up. Las las, he come advise Nigerians say make dem no allow members of the judiciary and opposition parties fool dem.
Police Don Seal Onnoghen Office
The police don seal off the office of the Chief Justice of Nigeria, Justice Walter Onnoghen wen President Muhammadu Buhari suspend last week Friday. The olokpa dem lock the office den dem come pursue all administrative staff for the axis of the CJN office around 7 0’clokc dis morning. This one dey happen even as the National Judicial Council fix tomorrow for one emergency meeting to take yarn on the way wen President Muhammadu Buhari take suspend Onnoghen of a sudden den swear in Justice Tanko Muhammad as the Acting CJN.
CCT Don Adjourn Onnoghen Mata
The Code of Conduct Tribunal, CCT for Abuja don adjourn more proceedings on the non assets declaration charge wen the Federal Government file against the Chief Justice of Nigeria, CJN, Justice Walter Onnoghen wen dey on suspension till further notice. The Mr. Danladi Umar-led tribunal talk say their decision to suspend Justice Onnoghen trial na based on the order of the Court of Appeal for Abuja. Meanwhile na only the CCT Chairmo and the third member of the panel, Mrs. Julie Amabo nia attend the sitting.
Coachee dey worried about Uzoho
Super Eagles Coachee, Gernot Rohr don talk say he dey worried about the team goalkeeper, Francis Uzoho wen no fit maintain the number one spot for him Segunda Division Club, Elche. Rohr make the comment becos of the Nigeria Professional Football League Match Day 4 between MFM FC and Rangers International FC of Enugu.
Complete Project for Delta State
One Niger Delta based human rights activist and environmentalist, Comrade Sheriff Mulade don tell Governor Ifeanyi Okowa say make he sharp sharp complete projects wen before before governor Uduaghan start in order to add more and quick infrastructural development for the state. Comrade Mulade wen yarn dis one for Warri, come talk say d last administration for the state start the Ughoto/Jeddo Omadino Road to link Sapele Road by Aziza junction for Okpe Local Government Area in order to reduce the heavy go slow wen dey dey for around shaguolo axis. He come beg Governor Okowa to complete them in order to create history and so dat he go continue to remain for the hearts of Deltans.
Delta Garri Don Come
Delta State Government don launch Delta Garri for Export in order to increase the socio-economic drive of the state. Governor Ifeanyi Okowa perform the launching for Asaba, the state capital for d flag-off of d job creation, exhibition and induction of 2018-2019 STEPreneurs and YAGEPreneurs of him job creation programme for the state. The Governor wen big big government odon dem escort come talk say the garri wen we dey produce and dey package for the state get very high quality. Even as d governor dey talk say agricultural reforms and ogbonge industrialization dey important to diversify the state economy through the development of d non-oil sectors, he come advise the export committee say make dem maintain the quality standard so dat the product go dey very ok for chewing.
I Appoint People Base On Merit
President Muhammadu Buhari talk say d heads of security agencies wen he appoint for him government yesterday na based on merit also say d people deserve am. Oga presido yarn dis one wen he dey address the Obi of Onitsha, Nnaemeka Achebe, other traditional and religious rulers for the palace of the king for Anambra state. Oga presido decide to make these comments becos of wetin the traditional rulers dey talk say he dey play the South East states wayo, especially for the military.
Too Late to Withdraw
The Independent National Electoral Commission (INEC) say e too late for any candidate to withdraw comot from contesting any position for the upcoming elections. INEC yarn dis one even as dem dey react to Oby Ezekwesili, presidential candidate of the Allied Congress Party of Nigeria (ACPN) wen say she no do again. Ezekwesili announce say she don remove body comot from d presidential race yesterday mor mor, say she wan collabo wit others work against candidates of the People’s Democratic Party (PDP) and All Progressives Congress (APC). But wen Rotimi Oyekanmi, chief press seceto to the INEC chairmo come dey react to dis Oby move, he come talk say na November 17 nia be the last date for withdrawal.
President Buhari Dey Support Evil
Before before Presido Olusegun Obasanjo say President Muhammadu Buhari don show say he no fit live up to expectation and say he dey support evil and corruption”. The elder statesman drop d fresh blasting for one interview wen he get with BBC Pidgin. Obasanjo come talk say he believe say Atiku Abubakar, presidential candidate of the Peoples Democratic Party (PDP), go perform “two times better” than Buhari.
private motor go get speedlimit dis year
The Federal Road Safety Corps (FRSC) say dem go begin the enforcement of speed limiting regulation on top private motor dem by dis year. Na Public Education Officer of the corps, Mr. Bisi Kazeem, nia download dis informate for one interview wen he get with d News Agency of Nigeria (NAN) for Abuja yesterday. Mr. Kazeem come talk say dem go fire down wit the enforcement after dem don yarn wit stakeholders.